RTC రూట్ల ప్రైవేటీకరణకు హైకోర్టు గ్రీన్ సిగ్నల్.. కార్మికులకు మరో ఝలక్

ఆర్టీసీ రూట్ల ప్రైవేటీకరణకు హైకోర్టు గ్రీన్ సిగ్నల్ ఇచ్చింది. దీంతో రాష్ట్ర ప్రభుత్వానికి ఉన్నత న్యాయస్థానంలో పెద్ద ఊరట లభించగా.. కార్మిక సంఘాలకు మరోసారి చుక్కెదురైంది. ఆర్టీసీ సమ్మె నేపథ్యంలో ప్రత్యామ్నాయ ఏర్పాట్లలో భాగంగా తెలంగాణ ప్రభుత్వం ఆర్టీసీలో ప్రైవేట్ రూట్లకు పర్మిట్లు ఇస్తూ ఉత్తర్వులు జారీ చేసిన విషయం తెలిసిందే. ఆర్టీసీలో 5,100 బస్సులకు ప్రైవేట్ రూట్ పర్మిట్లు ఇస్తూ కేసీఆర్ కేబినెట్ నిర్ణయం తీసుకుంది.

రూట్ల ప్రైవేటీకరణను వ్యతిరేకిస్తూ కార్మిక సంఘాల తరఫున ప్రొఫెసర్ కె.ఎల్. విశ్వేశ్వరరావు హైకోర్టులో పిటిషన్ దాఖలు చేశాయి. ఈ పిటిషన్లపై ఉన్నత న్యాయస్థానం శుక్రవారం (నవంబర్ 22) విచారణ చేపట్టింది. కేబినెట్ నిర్ణయంలో జోక్యం చేసుకోలేమని హైకోర్టు స్పష్టం చేసింది. మోటార్ వెహికల్ యాక్ట్ 1988 సెక్షన్ 102 ప్రకారం.. ప్రభుత్వానికి విశేష అధికారాలు ఉన్నాయని పేర్కొంది.

Also Read: అశ్వత్థామ అసమర్థత వల్లే ఆర్టీసీలో సమస్యలు..

రూట్ల ప్రైవేటీకరణ అంశంపై దాఖలైన రిట్ పిటిషన్‌తో పాటు ఇతర పిటిషన్లను హైకోర్టు కొట్టేసింది. ప్రభుత్వం తరఫున అడ్వొకేట్‌ జనరల్‌ వాదనలు వినిపించారు. ఈ సందర్భంగా సుప్రీంకోర్టు గతంలో ఇచ్చిన మూడు తీర్పులను ఏజీ ప్రస్తావించారు.

రూట్ల ప్రైవేటీకరణ ప్రక్రియ అమలు చేసే బాధ్యత ఎవరికి ఇచ్చారని హైకోర్టు ప్రశ్నించగా.. రాష్ట్ర రవాణా అథారిటీకి అధికారం అప్పగిస్తున్నట్టు కేబినెట్‌ తీర్మానంలో ఉందని ఏజీ వివరించారు. ప్రభుత్వం వేరు, అథారిటీ వేరని.. ప్రభుత్వం చేయాల్సిన పని అథారిటీ ఎలా చేస్తుందని హైకోర్టు ప్రశ్నించింది. రవాణా శాఖ ముఖ్య కార్యదర్శి ఈ ప్రక్రియ నిర్వహిస్తారని ఏజీ వివరించారు. ఇరు పక్షాల వాదనలు విన్న హైకోర్టు రూట్ల ప్రైవేటీకరణను వ్యతిరేకిస్తూ దాఖలైన పిటిషన్లను కొట్టేసింది. పూర్తి వివరాలు తెలియాల్సి ఉంది.