మృతదేహాల అప్పగింతపై కొనసాగుతున్న ఉత్కంఠ

దిశ కేసు నిందితుల మృతదేహాలను రీపోస్టుమార్టం నిర్వహించాకే బంధువులకు అప్పగిస్తామని హైకోర్టు స్పష్టం చేసింది. మృతదేహాలను అప్పగించే అంశంపై తుది నిర్ణయాన్ని సుప్రీంకోర్టు తమకే వదిలేసిందని హైకోర్టు ధర్మాసనం పేర్కొంది. మరోవైపు.. రీపోస్టుమార్టం అక్కర్లేదని అడ్వొకెట్ జనరల్ వాదనలు వినిపించారు. మృతదేహాలు ఇప్పటికే కుళ్లిపోతున్నాయని గాంధీ ఆస్పత్రి వైద్యులు కోర్టు దృష్టికి తీసుకొచ్చారు. షాద్‌నగర్ ఎన్‌కౌంటర్‌లో మరణించిన నలుగురు నిందితుల మృతదేహాల అప్పగింత అంశంపై హైకోర్టులో శుక్రవారం (డిసెంబర్ 20) వాడీ వేడీ వాదనలు జరిగాయి.

రీపోస్టుమార్టం అంశంపై తుది నిర్ణయాన్ని సుప్రీంకోర్టు తమకే వదిలేసిందని హైకోర్టు తెలిపింది. డిసెంబర్ 6న ఎన్‌కౌంటర్ జరిగిన రోజే మహబూబ్‌నగర్ ఆస్పత్రిలో నిందితుల మృతదేహాలకు పోస్టుమార్టం నిర్వహించారు. ప్రభుత్వ వైద్యులు పోస్టుమార్టం ప్రక్రియను సరిగానే నిర్వహించారని.. తమ వద్ద కూడా ఫోరెన్సిక్ నిపుణులు ఉన్నారని అడ్వొకెట్ జనరల్ తెలిపారు. అయితే.. ఈ వాదనను హైకోర్టు ధర్మాసనం తోసిపుచ్చింది.

‘దిశ ఘటన, షాద్‌నగర్ ఎన్‌కౌంటర్ అనంతరం ప్రపంచమంతా తెలంగాణ వైపు చూస్తోంది. ఇది పరువు ప్రతిష్టలకు సంబంధించిన అంశం. కాబట్టి మనం పారదర్శకంగా ఉండాలి’ అని హైకోర్టు ధర్మాసనం అభిప్రాయపడింది. అందువల్ల ప్రత్యేక బృందంతో మరోసారి పోస్టుమార్టం నిర్వహించాల్సి ఉందని స్పష్టం చేసింది.

Also Read: ఏడాదిలో కేటీఆర్ సాధించింది ఇదే.. అసలు సవాల్ ఇప్పుడే!

మృతదేహాల పరిస్థితిపై శనివారం ఉదయం నివేదిక సమర్పించాల్సిందిగా గాంధీ మెడికల్ కాలేజీ సూపరింటెండెంట్‌ను హైకోర్టు ధర్మాసనం ఆదేశించింది. విచారణ అనంతరం మృతదేహాల అప్పగింతపై నిర్ణయం తీసుకునే అవకాశం ఉంది. అప్పటివరకు మృతదేహాలను గాంధీ ఆస్పత్రిలోనే భద్రపరచాలని హైకోర్టు స్పష్టం చేసింది.