700 మంది విద్యార్థినులకు ఒక్కటే టాయిలెటా: హైకోర్టు ఆగ్రహం

Saroornagar Govt College: రాష్ట్రంలోని ప్రభుత్వ విద్యాసంస్థల్లో మెరుగైన వసతుల కోసం ఏమేం చర్యలు తీసుకుంటున్నారని రాష్ట్ర ప్రభుత్వాన్ని తెలంగాణ హైకోర్టు ప్రశ్నించింది. ఏప్రిల్‌ 25 లోగా విద్యాసంస్థల్లోని మౌలిక వసతులపై నివేదిక ఇవ్వాలని న్యాయస్థానం ఆదేశించింది. హైదరాబాద్‌లోని సరూర్‌నగర్ ప్రభుత్వ కళాశాలలో 700 మంది విద్యార్థులకు ఒక్కటే మూత్రశాల ఉండటం ఏంటని ఆగ్రహం వ్యక్తం చేసింది. తక్షణమే ప్రభుత్వ విద్యా సంస్థల్లో బాలికలకు మౌలిక వసతులను కల్పించాలని హైకోర్టు ఆదేశించింది

Authored byశ్రీనివాస్ గంగం | Samayam Telugu 2 Mar 2023, 8:08 pm

హైదరాబాద్‌: సరూర్‌నగర్‌ ప్రభుత్వ జూనియర్‌ కాలేజీలో టాయిలెట్ల సమస్యపై కొన్ని రోజుల కిందట విద్యార్థినులు వెలుబుచ్చిన ఆవేదన అందరినీ కదిలించిన సంగతి తెలిసిందే. తాజాగా తెలంగాణ హైకోర్టు (Telangana High Court) ఈ వ్యవహారంపై ఆగ్రహం వ్యక్తం చేసింది. 700 మంది విద్యార్థినులకు ఒకే టాయిలెట్ ఉండటం ఏంటని ప్రశ్నించింది. ప్రభుత్వ విద్యాసంస్థల్లో బాలికలకు మౌలిక వసతులను యుద్ధ ప్రాతిపదికన కల్పించాలని ఆదేశించింది. సరూర్‌నగర్ ప్రభుత్వ కాలేజీ సమస్యలపై ఎల్‌ఎల్‌బీ విద్యార్థి మణిదీప్‌ రాసిన లేఖను సుమోటోగా తీసుకున్న తెలంగాణ హైకోర్టు.. గురువారం (మార్చి 2) విచారణ చేపట్టింది.

రాష్ట్రంలోని ప్రభుత్వ విద్యాసంస్థల్లో మెరుగైన వసతుల కోసం ఏమేం చర్యలు తీసుకుంటున్నారని తెలంగాణ ప్రభుత్వాన్ని హైకోర్టు ప్రశ్నించింది. ఏప్రిల్‌ 25 లోగా విద్యాసంస్థల్లోని వసతులపై నివేదిక ఇవ్వాలని రాష్ట్ర ప్రభుత్వాన్ని ఉన్నత న్యాయస్థానం ఆదేశించింది. ఈ మేరకు రాష్ట్ర ప్రభుత్వ ప్రధాన కార్యదర్శి, విద్యాశాఖ కార్యదర్శి, ఇంటర్‌ బోర్డు కమిషనర్‌కు నోటీసులు జారీ చేసింది.

700 మంది విద్యార్థినులకు ఒక్కటే టాయిలెటా: హైకోర్టు ఆగ్రహం

తరవాత కథనం