సాయి గణేష్ సూసైడ్.. మంత్రి పువ్వాడకి హైకోర్టు నోటీసులు

తెలంగాణ రవాణా శాఖ మంత్రి పువ్వాడ అజయ్ కుమార్‌కి హైకోర్టు షాకిచ్చింది. ఖమ్మం జిల్లాకు చెందిన బీజేపీ కార్యకర్త సాయి గణేష్ ఆత్మహత్య కేసులో ఆయనకు నోటీసులు జారీ చేసింది. సాయి గణేష్ ఆత్మహత్య కేసును సీబీఐకి అప్పగించాలని కోరుతూ హైకోర్టులో లంచ్ మోషన్ పిటిషన్ దాఖలైంది. పిటిషన్‌ను స్వీకరించిన న్యాయస్థానం ఈరోజు మధ్యాహ్నం విచారణ జరిపింది. సాయి గణేష్ ఆత్మహత్యకు జిల్లా మంత్రి పువ్వాడ అజయ్ కుమార్, ఖమ్మం పోలీసులు కారణమని పిటిషనర్ తరఫు న్యాయవాది వాదనలు వినిపించారు. కేసు విచారణ పారదర్శకంగా జరగాలంటే సీబీఐకి అప్పగించాలని కోరారు.

వాదనలు విన్న న్యాయస్థానం ప్రతివాదులకు నోటీసులు జారీ చేసింది. మంత్రి పువ్వాడ అజయ్‌కి హౌకోర్టు నోటీసులిచ్చింది. మంత్రి పువ్వాడ అజయ్‌తో పాటు 8 మందికి న్యాయస్థానం నోటిసులిచ్చింది. ఈ కేసులో కౌంటర్ దాఖలు చేయాలని కోర్టు రాష్ట్ర ప్రభుత్వాన్ని ఆదేశించింది. కేంద్ర హోంశాఖ, తెలంగాణ హోం శాఖ ప్రిన్సిపల్ సెక్రటరీ, ఖమ్మం పోలీస్ కమిషనర్, టూ టౌన్ ఎస్‌హెచ్‌వో ప్రతివాదులుగా ఉన్నారు. వారందరికీ న్యాయస్థానం నోటీసులు పంపింది. తదుపరి విచారణ 29వ తేదీకి వాయిదా వేసింది.

బీజేపీ కార్యకర్త సాయి గణేష్ ఆత్మహత్య కేసు రాష్ట్రంలో తీవ్ర దుమారం రేపింది. మంత్రి పువ్వాడ, పోలీసులు అక్రమ కేసులు బనాయించి వేధించడం వల్లే సాయి గణేష్ ఆత్మహత్య చేసుకున్నాడని విపక్షాలు తీవ్ర ఆరోపణలు గుప్పిస్తున్నాయి. చనిపోయే ముందు సాయి గణేష్ మంత్రి పువ్వాడ, ఖమ్మం పోలీసులే తన ఆత్మహత్యకు కారణమని చెప్పాడని.. మంత్రిపై కేసు నమోదు చేయాలని డిమాండ్ చేస్తున్నాయి. అటు బీజేపీ.. ఇటు కాంగ్రెస్ కార్యకర్తలను కూడా మంత్రి వేధింపులకు గురిచేస్తున్నారని ఇరుపార్టీల నేతలు ఆందోళనలకు సిద్ధమవుతున్నారు. ఇలాంటి తరుణంలో హైకోర్టు నోటీసులు చర్చనీయాంశంగా మారాయి. మంత్రి పువ్వాడకు ఉచ్చు బిగుస్తోందన్న వాదనలు వినిపిస్తున్నాయి.

Also Read: