‘జనాల్లో ఇంకా నిర్లక్ష్యం ఉంది.. అప్పటిదాకా కొవిడ్ రూల్స్ పాటించాల్సిందే..’

కరోనా వైరస్ మహమ్మారి మరోసారి తీవ్రంగా వ్యాప్తి చెందే అవకాశం ఉన్న దృష్ట్యా వచ్చే మూడు నెలలు ప్రజలు మరింత అప్రమత్తంగా ఉండాలని ప్రజారోగ్య సంచాలకుడు డాక్టర్ శ్రీనివాస్‌ తెలిపారు. నవంబర్‌ నెలలో రాష్ట్రంలో పెళ్లిళ్లు చాలా ఉన్నందున ప్రజల్ని అప్రమత్తం చేస్తున్నట్లు చెప్పారు. వచ్చే మూడు నెలల వరకు పెళ్లిళ్లే కాకుండా ఇతరత్రా కార్యక్రమాలకు కూడా దూరంగా ఉండటం మంచిదని ఆయన సూచించారు. ప్రపంచ వ్యాప్తంగా కరోనా వ్యాక్సిన్‌పై అనేక పరిశోధనలు కొనసాగుతున్నాయని, వ్యాక్సిన్ వచ్చేందుకు మరో 3 నెలల వరకూ సమయం పట్టే అవకాశం ఉందని అన్నారు. అది వచ్చే వరకు ఎవరికి వారు అప్రమత్తంగా ఉండాల్సిందేనని తేల్చి చెప్పారు. హైదరాబాద్‌ కోఠిలోని డైరెక్టర్‌ ఆఫ్‌ పబ్లిక్‌ హెల్త్‌ కార్యాలయంలో డాక్టర్ శ్రీనివాస్ మీడియా సమావేశం నిర్వహించారు.

కరోనా వ్యాప్తి నేపథ్యంలో గత 8 నెలలుగా పాటిస్తూ వస్తున్న నిబంధనలే కఠినంగా అమలు చేయాలని సూచించారు. ‘‘రాష్ట్ర ప్రభుత్వం, ఆరోగ్య శాఖ సూచిస్తున్న అన్ని సూచనలను ఎక్కువ శాతం ప్రజలు పాటిస్తున్నారు. అదే సమయంలో ప్రజల్లో నిర్లక్ష్య వైఖరిని కూడా మేం గమనించాం. ఎంతో మంది మాస్కులు ధరించడం లేదు. ఫిజికల్ డిస్టెన్స్ కూడా పాటించడం లేదు. మాస్కులు ధరించిన వారు సైతం సరైన పద్ధతిలో ధరించడం లేదు.’’ అని డా.శ్రీనివాస్‌ తెలిపారు.

‘‘ఆరోగ్య శాఖ సూచించిన నియమాలు పాటించడంలో ప్రజలు ఎలాంటి నిర్లక్ష్యం చేయకూడదు. ఇప్పటివరకు లక్షలాది మంది ప్రజలు కొవిడ్ బారిన పడకుండా కాపాడుకుంటూ వచ్చాం. ప్రపంచ వ్యాప్తంగా సెకెండ్‌ వేవ్‌, థర్డ్‌ వేవ్‌ అని మరోసారి కరోనా విజృంభణ గురించి వింటున్నాం. అలాంటి పరిస్థితులు మన రాష్ట్రంలో వచ్చేలా మన చేతులారా చేసుకోకూడదు. దీపావళి పండగను దీపాలతో జరుపుకొందాం. కరోనా పరిస్థితులను దృష్టిలో పెట్టుకొని టపాసులకు దూరంగా ఉందాం’’ అని వివరించారు.