తుక్కుగూడలో తుప్పు మాటలు.. అమిత్ షా వ్యాఖ్యలకు కేటీఆర్ కౌంటర్

తుక్కుగూడలో బీజేపీ నేతలు చెప్పిన తుప్పు మాటలను విశ్వసించేందుకు తెలంగాణ ప్రజలు సిద్ధంగా లేరని మంత్రి కేటీఆర్ అన్నారు. కేంద్ర హోంమంత్రి అమిత్‌షా మాట్లాడిన మాటల్లో ఒక్కటి కూడా నిజం లేదని.. ప్రసంగం మొత్తం పచ్చి అబద్దాలు, అర్ధసత్యాలు మాట్లాడారని ఆగ్రహం వ్యక్తంచేశారు. తెలంగాణ భవన్‌లో మీడియాతో మాట్లాడిన కేటీఆర్.. తుక్కుగూడలో బీజేపీ నిర్వహించిన సభపై విమర్శలు గుప్పించారు. బీజేపీ నేతలు చేసిన వ్యాఖ్యలకు కౌంటర్ ఇచ్చారు.

'తుక్కుగూడ సభలో అమిత్ షా ప్రసంగం అంతా అబద్దాల మయం. ఆయన అమిత్‌షా కాదు. అబద్దాల బాద్‌షా. ఆయన అలా పేరు మార్చుకుంటే మంచిది. తెలంగాణ రాష్ట్రానికి పనికి వచ్చే అంశం ఒక్కటి కూడా లేదు. డబ్బాలో గులకరాళ్లు వేసి ఊపితే సౌండ్‌లా తప్ప.. అంతకుమించి ఏం లేదు. బీజేపీకి క్షేత్రస్థాయిలో బలం లేదు. గత సార్వత్రిక ఎన్నికల్లో 119 ఎన్నికల్లో బీజేపీ నాయకులు పోటీ చేస్తూ.. 108 సీట్లలో డిపాజిట్లు గల్లంతయ్యాయి. అమిత్ షా ప్రజలను తప్పుదోవ పట్టించే విధంగా మాట్లాడారు. వాట్సాప్‌ యూనివర్సిటీలో జరిగే ప్రచారాన్నే.. వాస్తవాలుగా చెప్పే ప్రయాత్నం చేశారు..' అని కేటీఆర్ విమర్శించారు.

ముఖ్యమంత్రి పదవి కావాలంటే రూ.2500 కోట్లు ఇవ్వాలని బీజేపీ అధిష్టానం అడిగిందని కర్ణాటక రాష్ట్రంలో ఆ పార్టీ ఎమ్మెల్యే పాటిల్‌ యాత్నాల్‌ చేసిన వ్యాఖ్యలను కేటీఆర్ గుర్తుచేశారు. ఈ వ్యాఖ్యలను ఎవరూ ఖండించలేదని.. ఇంతవరకు ఆ ఎమ్మెల్యేను సస్పెండ్ కూడా చేయలేదన్నారు. గత ఎనిదేళ్లలో తెలంగాణకు ఏం చేశారని చెప్పాలని అమిత్ షాను తాము కోరామని.. వాటి గురించి నిజాలు మాట్లాడకుండా నిజాం గురించి మాట్లాడుతున్నారని అన్నారు. బీజేపీ స్టీరింగ్ రెండు కార్పొరేటర్ కంపెనీల చేతిలో ఉందని.. ఈ విషయం అందరికీ తెలుసని మంత్రి అన్నారు.