ఆశా.. నిరాశేనా.! ‘టీడీపీ’ సహచరులకి కేసీఆర్ షాక్

తెలంగాణ ఎమ్మెల్సీ ఎన్నికల వ్యవహారం రాజకీయవర్గాల్లో హాట్‌టాపిక్‌గా మారింది. ఎమ్మెల్సీ బెర్త్ కోసం నేతలు భారీగానే లాబీయింగ్ చేసినట్లు తెలుస్తోంది. అనూహ్యంగా కలెక్టర్ వెంకట్రామిరెడ్డి, రాజ్యసభ సభ్యుడు బండ ప్రకాష్‌ చోటు దక్కించుకోవడం ఆసక్తికరంగా మారింది. అయితే ఎమ్మెల్సీ పదవులు ఆశించిన మాజీ సహచరులకు మాత్రం మొండిచేయి ఎదురైందన్న విమర్శలు వినిపిస్తున్నాయి.

గతంలో టీడీపీలో మంత్రులుగా పనిచేసిన మాజీ సహచరులు మోత్కుపల్లి నర్సింహులు, ఉమ్మడి కరీంనగర్ జిల్లాకు చెందిన ఇనుగాల పెద్దిరెడ్డి, అదే జిల్లాకు చెందిన ఎల్‌.రమణ పేర్లు రేసులో ఉన్నట్లు ప్రచారం జరిగినా చివరికి నిరాశే ఎదురైంది. ఒకప్పుడు టీడీపీలో ఓ వెలుగు వెలిగిన సదరు నేతలకు ఎమ్మెల్సీ అభ్యర్ధుల ఎంపికలో అదృష్టం వరించలేదు. టీడీపీ రాష్ట్ర అధ్యక్షుడిగా ఉన్న ఎల్. రమణ హుజూరాబాద్ ఎన్నికలకు ముందు టీఆర్‌ఎస్‌లో చేరారు. ఆయనను హుజూరాబాద్ ఉప ఎన్నికలో బరిలో దించుతారన్న ప్రచారమూ జరిగింది. కానీ ఎమ్మెల్సీగా అవకాశం కల్పిస్తారని.. సీఎం కేసీఆర్ హామీ ఇచ్చినట్లు కూడా గుప్పుమంది.

మరోవైపు ఈటల బీజేపీలో చేరడంతో అలకబూని కమలం పార్టీ నుంచి బయటికొచ్చేసిన సీనియర్ నేత పెద్దిరెడ్డికి సముచిత గౌరవం కల్పిస్తారని ఆశించారు. ఉప ఎన్నికలో పెద్దిరెడ్డి క్షేత్రస్థాయిలో కీలకంగా పనిచేశారు కూడా. అయినా ఆయనకు అదృష్టం దక్కలేదు. దళిత బంధు పథకంతో సీఎం కేసీఆర్‌పై ప్రశంసల వర్షం కురిపించి మరీ టీఆర్‌ఎస్‌లో చేరిన మోత్కుపల్లి నర్సింహులు కూడా ఎమ్మెల్సీ రేసులో వెనకబడ్డారు. ఆయనను ఎమ్మెల్సీ లేదా దళిత బంధు పథకం చైర్మన్‌గా నియమిస్తారని ప్రచారం జరిగింది. ఆయనని కూడా ఎమ్మెల్సీ పదవి వరించకపోవడంతో మాజీ సహచరులకు కేసీఆర్ మొండిచేయి చూపారన్న అభిప్రాయాలు వ్యక్తమవుతున్నాయి.

Also Read: