గవర్నర్ తమిళిసైకు స్పీకర్ పోచారం సర్‌‌ప్రైజ్

తెలంగాణ గవర్నర్‌ తమిళిసై సౌందర రాజన్‌కు శాసన సభ స్పీకర్‌ పోచారం శ్రీనివాస్‌రెడ్డి సర్‌ ప్రైజ్‌ ఇచ్చారు. కొత్త సంవత్సరం సందర్భంగా గవర్నర్‌ తమిళిసై రాజ్‌భవన్‌ నుంచి ఫోన్‌ఇన్‌ ద్వారా ప్రజలతో మాట్లాడారు. కానీ, ఊహించని విధంగా స్పీకర్‌ పోచారం కూడా నేరుగా గవర్నర్‌కు ఫోన్‌ చేసి కొత్త సంవత్సర శుభాకాంక్షలు తెలిపారు. స్పీకర్‌ కాల్‌చేయడంతో ఆశ్చర్యపోయిన గవర్నర్‌ తమిళిసై కూడా.. ఆయనకు కొత్త సంవత్సర శుభాకాంక్షలు తెలిపారు.

అయితే, ఏటా నూతన సంవత్సరం రోజున రాజ్‌భవన్‌లో ఓపెన్‌హౌస్‌ నిర్వహించడం సంప్రదాయంగా వస్తోంది. ముఖ్యమంత్రితో సహా మంత్రులు, ప్రజా ప్రతినిధులు, వివిధ రంగాల ప్రముఖులు, మామూలు ప్రజలు కూడా ఈ కార్యక్రమానికి హాజరై గవర్నర్‌ను కలిసే అవకాశం కల్పించేవారు. కానీ ఈసారి కరోనా కారణంగా ఓపెన్‌ హౌస్‌ను రద్దు చేశారు. దానికి బదులుగా నేరుగా గవర్నర్‌ ఫోన్‌ ఇన్‌ ద్వారా ప్రజలతో మాట్లాడారు. శుక్రవారం ఉదయం 10 గంటలకు ఫోన్‌ ఇన్‌ను ప్రారంభించగా ఆగకుండా ఫోన్ కాల్స్‌ వచ్చినట్టు రాజ్‌భవన్‌ వర్గాలు తెలిపాయి. దాదాపు ఒకే గంటలో 60 కాల్స్‌ వచ్చినట్టు తెలిపారు.

సాధారణ ప్రజల్లో ఎక్కువగా పిల్లల నుంచి ఎక్కువగా కాల్స్‌ వచ్చినట్టు రాజ్ భవన్ వర్గాలు చెప్పాయి. గవర్నర్‌ తెలుగు, తమిళం, ఇంగ్లీష్‌, హిందీలో మాట్లాడారు. చాలా మంది కాలర్స్‌ తమ సమస్యలను కూడా గవర్నర్‌కు విన్నవించారు. ఇందులో ప్రైవేట్‌ టీచర్స్‌, ఇంజనీరింగ్‌ కాలేజీల్లో పనిచేస్తున్న కాంట్రాక్ట్‌ లెక్చరర్స్‌ వారి సమస్యలను గవర్నర్‌కు వివరించినట్లుగా తెలుస్తోంది. అయితే రాతపూర్వకంగా రాజ్‌భవన్‌కు ఫిర్యాదులు పంపాలని తమిళిసై వారికి సూచించినట్లుగా సమాచారం. ఇలా చేస్తే తగిన చర్యలు తీసుకుంటామని గవర్నర్ వారికి హామీ ఇచ్చారు.

ఇవి కూడా చదవండి