Tenth Exams: కీలక ఆదేశాలిచ్చిన కేసీఆర్ సర్కార్

కరోనా లాక్‌డౌన్ కారణంగా మూతపడిన పాఠశాలలు తెరుచుకోనున్నాయి. ఫిబ్రవరి ఒకటో తేదీ నుంచి పాఠశాలలు తెరిచేందుకు ఇప్పటికే అధికారులు సన్నాహాలు చేస్తున్నారు. దాదాపు పది నెలల తర్వాత పాఠశాలలు బడి తలుపులు తెరిచేందుకు తెలంగాణ ప్రభుత్వం ఆదేశాలు జారీ చేసింది. తొమ్మది, పదో తరగతి విద్యార్థులకు తరగతులు ప్రారంభించాలని ముఖ్యమంత్రి ఆదేశాల మేరకు పాఠశాల విద్యాశాఖ ఉత్తర్వులు జారీ చేసింది. అకడమిక్ షెడ్యూల్‌ను కూడా ఖరారు చేస్తూ ఆదేశాలిచ్చింది.

తాజా ఆదేశాల మేరకు.. కేవలం 9, 10 తరగతుల విద్యార్థులకు తరగతులు జరగనున్నాయి. ఉదయం 9.30 గంటల నుంచి సాయంత్రం 4.45 గంటల వరకూ పాఠశాలల పని గంటలుగా నిర్ణయించారు. హైదరాబాద్, సికింద్రాబాద్ జంట నగరాల్లో ఉదయం 8.45 గంటల నుంచి సాయంత్రం 4.00 గంటల వరకూ పాఠశాలలు నిర్వహించాలని ఉత్తర్వుల్లో పేర్కొన్నారు.

పాఠశాలలకు పంపేందుకు విద్యార్థుల తల్లిదండ్రుల అనుమతి తప్పనిసరని.. పాఠశాలకు పంపడం ఇబ్బందికరంగా భావిస్తే ఆన్‌లైన్ క్లాసులు వినొచ్చని తెలిపింది. టెన్త్ విద్యార్థులకు ఉదయం 10 నుంచి 11 గంటల వరకూ, 9 వ తరగతి విద్యార్థులకు సాయంత్రం 4 నుంచి 5 గంటల వరకూ ఆన్‌లైన్ క్లాసులు జరుగుతాయి. టీశాట్, దూరదర్శన్‌లో ఆన్‌లైన్ తరగతులకు హాజరుకావొచ్చని విద్యాశాఖ తెలిపింది.

17 నుంచి పరీక్షలు..
అలాగే ఈ విద్యా సంవత్సరంలో పదో తరగతి పరీక్షలు మే 17 వ తేదీ నుంచి ప్రారంభమై.. 26 వ తేదీతో ముగుస్తాయని పాఠశాల విద్యాశాఖ ఉత్తర్వుల్లో పేర్కొంది. గత సెప్టెంబర్ ఒకటి నుంచి జనవరి 31 వ తేదీ వరకు 115 రోజులు వర్చువల్ పద్ధతిలో తరగతులు జరిగాయని.. ఫిబ్రవరి ఒకటి నుంచి మే 26 వరకు పాఠశాలలు జరుగుతాయని.. ఈ విద్యాసంవత్సరం 204 రోజులు పనిదినాలుగా పేర్కొంది. తల్లిదండ్రుల రాతపూర్వక సమ్మతితోనే విద్యార్థులు పాఠశాలకు హాజరవ్వాలని.. హాజరు తప్పనిసరి కాదని తెలియజేసింది.

Also Read: