తెలంగాణలో టెన్త్ విద్యార్థులకు శుభవార్త.. ఆర్టీసీ బ‌స్సుల్లో ఉచితంగా ప్రయాణం

తెలంగాణలో పదో తరగతి పరీక్షలకు సర్వం సిద్ధమైంది. విద్యాశాఖ మంత్రి సబితా ఇంద్రారెడ్డి (Sabitha Indra Reddy) జిల్లాల అధికారులతో వీడియో కాన్ఫరెన్స్‌ నిర్వహించారు. పరీక్షలకు ఏర్పాట్లపై సమీక్ష చేశారు.. కొన్ని సూచనలు చేశారు. రాష్ట్రవ్యాప్తంగా 4,94,620 మంది విద్యార్థులు ఈ పరీక్షలకు హాజరవుతున్నారని.. మొత్తం 2,652 కేంద్రాలు ఏర్పాటు చేశామని వెల్లడించారు. అలాగే పరీక్షలకు హాజరయ్యే విద్యార్థులు ఆర్టీసీ బస్సుల్లో ఉచితంగా ప్రయాం చేయొచ్చని.. తమ హాల్ టికెట్లు చూపిస్తే చాలు అన్నారు. టెన్త్ పరీక్షలకు హాజరవుతున్న విద్యార్థులు ఎలాంటి ఒత్తిళ్లు, ఆందోళన లేకుండా సిద్ధమవ్వాలని సూచించారు. ఒకవేళ విద్యార్థులకు పరీక్షలపై సందేహాలు ఉంటే నివృత్తి చేయాలని సూచించారు. అలాగే విద్యార్థుల్లో స్కూళ్ల యాజమాన్యాలు, టీచర్లు, తల్లిదండ్రులు మనో ధైర్యం నింపాలన్నారు. పరీక్షలు సజావుగా జరిగేలా చూడాలని కలెక్టర్లకు సూచించారు. ఎండల తీవ్రత ఉందని.. పరీక్షా కేంద్రాల దగ్గర తాగునీరు, ఓఆర్‌ఎస్‌ అందుబాటులో ఉంచాలని సూచించారు. పరీక్షా కేంద్రాల్లో విద్యార్థులకు ఎలాంటి సమస్యలు ఉండకూడదని.. దీనికి తగినట్లుగా ఏర్పాట్లు ఉండాలన్నారు.

అలాగే పరీక్షా కేంద్రాల దగ్గర సీసీ కెమెరాలు, కంట్రోల్‌ రూం ఏర్పాటు చేస్తున్నట్లు మంత్రి తెలిపారు. ఇప్పటికే హాల్‌టికెట్లను ఆయా స్కూళ్లకు పంపించామని.. విద్యార్థులు ఆన్‌లైన్లో డౌన్‌లోడ్‌ చేసుకునే అవకాశం ఉందన్నారు. అలాగే ఈసారి పరీక్ష పేపర్ల సంఖ్యను 11 నుంచి ఆరుకి తగ్గించామని.. సైన్స్‌ పరీక్ష రోజు ఫిజిక్స్, బయాలజీ ప్రశ్నపత్రాలు, జవాబు పత్రాలు విడివిడిగా అందిస్తామన్నారు. అలాగే సమస్యాత్మక పరీక్షా కేంద్రాల దగ్గర భద్రతను కట్టుదిట్టం చేయనున్నారు. అవసరమైన చోట విద్యుత్‌కు అంతరాయం లేకుండా చూసుకోవాలని సూచనలు చేశారు మంత్రి సబితా ఇంద్రారెడ్డి.

ప‌దో త‌ర‌గ‌తి పరీక్షలు ఏప్రిల్‌ 3న ప్రారంభం కానున్నాయి. ప‌రీక్ష‌లు ఉద‌యం 9:30 నుంచి మ‌ధ్యాహ్నం 12:30 వ‌ర‌కు జరుగుతాయి. ఆ షెడ్యూల్ ఇలా ఉంది.. ప‌రీక్ష‌లు ఉద‌యం 9:30 గంట‌ల‌కు ప్రారంభ‌మ‌వుతాయి.. అయితే 9:35 గంట‌ల వ‌ర‌కు మాత్ర‌మే విద్యార్థుల‌ను అనుమ‌తిస్తామ‌ని మంత్రి తెలిపారు.

ఏప్రిల్ 3 – ఫ‌స్ట్ లాంగ్వేజ్
ఏప్రిల్ 4 – సెకండ్ లాంగ్వేజ్
ఏప్రిల్ 6 – థ‌ర్డ్ లాంగ్వేజ్ (ఇంగ్లీష్‌)
ఏప్రిల్ 8 – గ‌ణితం
ఏప్రిల్ 10 – సామాన్య శాస్త్రం (ఫిజిక్స్, బ‌యాల‌జీ)
ఏప్రిల్ 11- సాంఘిక శాస్త్రం
ఏప్రిల్ 12 – ఓఎస్సెస్సీ మెయిన్ లాంగ్వేజ్ పేప‌ర్-1
ఏప్రిల్ 13 – ఓఎస్సెస్సీ మెయిన్ లాంగ్వేజ్ పేప‌ర్-2

• Read More Telangana News And Telugu News