bhainsaలో తీవ్ర ఉద్రిక్తతలు.. 144 సెక్షన్ అమలు.. మెల్లిగా ప్రశాంత వాతావరణం

నిర్మల్ జిల్లా భైంసాలో ఉద్రిక్తత పరిస్థితులు ఇప్పుడిప్పుడే చల్లారుతున్నాయి. ఆదివారం రాత్రి మొదలైన రెండు వర్గాల మధ్య మొదలైన రగడ్ తర్వాత ప్రశాంత వాతావరణం కనిపిస్తోంది. 144 సెక్షన్ అమలులో ఉండటంతో పోలీసుల్ని భారీగా మోహరించారు. సున్నితమైన ప్రాంతాల్లో భద్రతను కట్టుదిట్టం చేశారు. కలెక్టర్, ఎస్పీలు పరిస్థితి ఎప్పటికప్పుడు పర్యవేక్షిస్తున్నారు. శాంతిభద్రతలకు విఘాతం కలిగించే వారిపై కఠిన చర్యలు తప్పవని పోలీసులు హెచ్చరిస్తున్నారు.

భైంసాలో ఆదివారం రాత్రి రెండు వర్గాల మధ్య ఘర్షణ ఉద్రిక్తతలకు దారి తీసింది. చిన్న గొడవగా మొదలై.. తర్వాత ఘర్షణకు దారి తీసింది. రాళ్ల దాడులు, ఇళ్ల ముందు ఉంచి బైక్‌లను తగులబెట్టడంతో టెన్షన్ మొదలయ్యింది. కొన్ని ఇళ్లను ధ్వంసం చేసి నానా బీభత్సం సృష్టించారు. వెంటనే పోలీసులు రంగలోకి దిగి పరిస్థితిని అదుపులోక తెచ్చేందుకు ప్రయత్నించినా ఫలితం లేకుండా పోయింది. పట్టణం మొత్తం యుద్ధ వాతావరణాన్ని తలపించింది.

ఆందోళనకారులు కొందరు పోలీసులపై రాళ్ల దాడి చేశారు. ఈ ఘర్షణలో పోలీసులకు తీవ్ర గాయాలు అయ్యాయి. వెంటనే ప్రత్యేక బలగాలను రంగంలోకి దించారు. సున్నితమైన ప్రాంతాల్లో భారీగా పోలీసుల్ని మోహరించారు. రాళ్ల దాడిలో భైంసా డీఎస్పీ నరసింహారావు, పట్టణ సీఐ వేణుగోపాలరావు, ముథోల్‌ ఎస్సై అశోక్‌, కొందరు కానిస్టేబుళ్లు గాయపడ్డారు.. అలాగే ఇరువర్గాలకు చెందిన పలువురు గాయపడ్డారు.