ఏపీ, తెలంగాణ ప్రజలకు గుడ్ న్యూస్.. తెలుగు రాష్ట్రాలను వదలనున్న వరణుడు!

గత నెల రోజుల నుంచి తెలంగాణలో విస్తారంగా వర్షాలు కురుస్తున్నాయి. గతంలో ఎన్నడూ లేని రీతిలో జూలై నెలలో భారీ వర్షాలు కురవడంతోపాటు.. గోదావరి నదికి భారీగా వరదలొచ్చాయి. జూలై అంత కాకున్నా.. ఆగస్టులోనూ రాష్ట్రంలో భారీ వానలు కురుస్తున్నాయి. ముఖ్యంగా హైదరాబాద్ నగరంలోనైతే ప్రతి రోజూ వర్షం కురుస్తోంది. సోమవారం నుంచి నగరంలో ముసురు పట్టింది. నేటి (మంగళవారం) ఉదయం కూడా వర్షం కురుస్తోంది. దీంతో ఈ వర్షాలు తగ్గితే బాగుండని జనాలు కోరుకుంటున్నారు.

మంగళవారం సైతం హైదరాబాద్, రంగారెడ్డి, వికారాబాద్, నల్గొండ, మహబూబ్‌నగర్, సంగారెడ్డి జిల్లాల్లో తేలికపాటి నుంచి ఓ మోస్తరు వర్షాలు కురుస్తాయని తెలంగాణ వెదర్ మ్యాన్ బాలాజీ తెలిపారు. ఉత్తర తెలంగాణ జిల్లాల్లో ఓ మాదిరి నుంచి భారీ వర్షాలు కురిసే అవకాశం ఉందని, మిగతా జిల్లాల్లో జల్లులు పడతాయన్నారు. గాలుల తీవ్రత ఎక్కువగా ఉంటుందన్నారు. అయితే రేపటి నుంచి వర్షాలు తగ్గుముఖం పడతాయని ఆయన తెలిపారు.

కాగా మంగళవారం తెలంగాణలోని 5 జిల్లాల్లో భారీ నుంచి అతి భారీ వర్షాలు కురుస్తాయని వాతావరణ శాఖ హెచ్చరించింది. దీంతో నిర్మల్, ఆదిలాబాద్, మంచిర్యాల, జగిత్యాల, భూపాలపల్లి జిల్లాలకు రెడ్ అలర్ట్ జారీ చేసింది. ఉత్తర తెలంగాణలోని మిగతా జిల్లాలకు ఆరెంజ్ అలర్ట్ జారీ చేశారు. మరోవైపు ఉత్తరాంధ్ర జిల్లాల్లోనూ బారీ వర్షాలు కురుస్తాయని వాతావరణ శాఖ తెలిపింది.
మరోవైపు బంగాళాఖాతంలో ఏర్పడిన అల్పపీడనం ప్రభావంతో ఏపీలోనూ వర్షాలు కురుస్తున్నాయి. కాగా బుధవారం నుంచి వారాంతం వర్షాలు కురిసే అవకాశం లేదని, పొడి వాతావరణం ఉంటుందని ఏపీ వెదర్ మ్యాన్ తెలిపారు. మళ్లీ శనివారం నుంచి కోస్తాంధ్రలో వర్షపాతం నమోదవుతుందన్నారు.