టమాట ధరలకు రెక్కలు... కిలో రూ.50 దాటిన ధర

కరోనా దెబ్బకు కూరగాయల ధరలు కూడా చుక్కలనంటుతున్నాయి. వారం క్రితం కిలో రూ.5 పలికిన ధర... ఇప్పుడు ఏకంగా రూ. 50 దాటింది. వారం క్రితం వరకు నేల చూపులు చూసిన టమాట ధరలకు ఒక్కసారిగా రెక్కలు వచ్చాయి. అమాంతం పెరిగి ధరలు కొండెక్కి కూర్చున్నాయి. దీంతో మార్కెట్లలో కిలో టమాట రూ. 50 పలుకుతోంది. మార్కెట్లో వీటి ధరల బోర్డును చూసిన జనం బెంబేలెత్తిపోతున్నారు. ఇలా అయితే కూరగాయలు కొనేది ఎలా అంటూ వాపోతున్నారు. అసలే కరోనా సీజన్.. దీనికి తోడు పన్నుల భారం, పెరిగిన ధరలతో పాటు టమాట కూడా వాత పెట్టడంతో ఉక్కిరిబిక్కిరి అవుతున్నారు.

డిమాండ్‌కు సరిపడా సరఫరా లేకపోవడమే దీనికి కారణమని వ్యాపారులు చెబుతున్నారు. మరో రెండు నెలల వరకు కూడా పరిస్థితి ఇలాగే ఉండే అవకాశం ఉందని అంటున్నారు. సాగు విస్తీర్ణం తగ్గిపోవడం దీనికి ప్రధాన కారణమని చెబుతున్నారు. దీంతో నిన్నా మొన్నటి వరకు రూ. 20 పలికిన టమాట ఇప్పుడు ఏకంగా రూ. 50కి తగ్గడం లేదన్నారు. ఒక్క హైదరాబాద్ నగరంలోనే రోజుకు సగటున 6 వేల క్వింటాళ్లు అమ్ముడు పోతుంది

కానీ దిగుమతులు ఆ స్థాయిలో లేవని అంటున్నారు. తెలంగాణలో పంట తక్కువగా ఉండటంతో ఏపీ, కర్నాటక ప్రాంతల నుంచి తీసుకువస్తున్నామని చెబుతున్నారు. కాగా ఇటీవల లాక్‌డౌన్ కారణంగా హోటళ్లు, రెస్టారెంట్లు మూసివేయడంతో టమాటాకు గిరాకీ తగ్గుతూ వచ్చింది. అవన్నీ ఇప్పుడు తెరుచుకోవడం, సరఫరా తగ్గడంతో టమాటా కొనాలంటేనే జనం భయపడిపోతున్నారు.