Revanth Reddy: కోమటిరెడ్డికి బహిరంగ క్షమాపణలు చెప్పిన రేవంత్ రెడ్డి.. ఆసక్తి రేపుతున్న కాంగ్రెస్ రాజకీయం!

భువనగిరి ఎంపీ కోమటిరెడ్డి వెంకటరెడ్డికి టీపీసీసీ చీఫ్ రేవంత్ రెడ్డి బహిరంగ క్షమాపణలు చెప్పారు. రేవంత్ రెడ్డి తనను హోంగార్డ్‌తో పోల్చి అవమానించాడని.. ఆ వ్యాఖ్యలను వెనక్కి తీసుకొని వెంటనే క్షమాపణలు కోరాలని వెంకటరెడ్డి చేసిన డిమాండ్ పట్ల టీపీసీసీ చీఫ్ స్పందించారు. కోమటిరెడ్డి క్షమాపణలు చెబుతూ ఆయన ట్వీట్ చేశారు. ‘ఈ మధ్య పత్రికా సమావేశంలో హోంగార్డ్ ప్రస్తావన.. మునుగోడు బహిరంగ సభలో అద్దంకి దయాకర్.. కోమటిరెడ్డిని ఉద్దేశించి పరుష పదజాలం వాడటంతో.. పీసీసీ చీఫ్‌ సారీ చెప్పాలని డిమాండ్ చేశారు. నేను భేషరతుగా క్షమాపణలు చెబుతున్నాను. ఇలాంటి భాష ఎవరికీ మంచిది కాదు. తెలంగాణ ఉద్యమంలో క్రియాశీలక పాత్ర పోషించి.. రాష్ట్ర సాధనలో పాత్ర పోషించిన కోమటిరెడ్డి వెంకటరెడ్డి గారిని ఎవరూ అవమానించేలా మాట్లాడటం తగదు. తదుపరి చర్యల కోసం క్రమశిక్షణా సంఘం చైర్మన్ చిన్నారెడ్డి గారికి సూచన చేస్తున్నా’ అని రేవంత్ రెడ్డి వీడియో సందేశాన్ని పోస్టు చేశారు. కోమటిరెడ్డి వెంకటరెడ్డి సోదరుడు రాజగోపాల్ రెడ్డి ఇప్పటికే కాంగ్రెస్ పార్టీకి, ఎమ్మెల్యే పదవికి రాజీనామా చేసిన సంగతి తెలిసిందే. దీంతో మునుగోడులో ఉపఎన్నిక అనివార్యమైంది. మరోవైపు వెంకటరెడ్డి సైతం కేంద్ర హోం మంత్రి అమిత్ షాను కలిశారు. దీంతో ఆయన కూడా బీజేపీలో చేరతారని ప్రచారం జరిగింది. ఈ నేపథ్యంలో.. మునుగోడు నియోజకవర్గంలోని చండూరులో కాంగ్రెస్ పార్టీ సభ నిర్వహించగా.. వెంకటరెడ్డి దూరంగా ఉన్నారు.
శుక్రవారం మీడియాతో మాట్లాడిన భువనగిరి ఎంపీ కోమటిరెడ్డి వెంకటరెడ్డి.. తనను కాంగ్రెస్ పార్టీ నుంచి వెళ్లగొట్టే కుట్ర జరుగుతోందని ఆరోపించారు. రాజగోపాల్‌రెడ్డి కాంగ్రెస్‌ పార్టీని వీడినందుకు తనను టార్గెట్ చేసి అవమానాలకు గురిచేస్తున్నారన్నారు. ఎన్నో ఏళ్లుగా కాంగ్రెస్ పార్టీలో కొనసాగుతూ.. పార్టీ కోసం పనిచేస్తున్న తనను రేవంత్ రెడ్డి హోంగార్డుతో పోల్చడం బాధ కలిగించిందన్నారు. మునుగోడు ఉపఎన్నిక విషయంలో పార్టీ నేతలు తనను పట్టించుకోవడం లేదని ఆరోపించారు.

తాను కాంగ్రెస్ పార్టీనే నమ్ముకున్నానని.. తెలంగాణ కోసం మంత్రి పదవికి సైతం రాజీనామా చేశానని.. అలాంటి తనపై రేవంత్ రెడ్డి, ఇతర నాయకులు నోటికొచ్చినట్లు మాట్లాడం సరికాదన్న వెంకటరెడ్డి.. చండూరు సభలో ఓ నాయకుడు తన గురించి అసభ్యంగా మాట్లాడితే పార్టీ పెద్దలు వారించలేదని వాపోయారు. తనలాంటి వాళ్లందర్నీ బయటకు పంపించి పార్టీని ఖాళీ చేయించాలని అనుకుంటున్నారని ఆరోపించారు.

మునుగోడు నియోజకవర్గంలో కాంగ్రెస్ పార్టీ పాదయాత్ర ప్రారంభానికి కొద్ది గంటల ముందు వెంకటరెడ్డికి రేవంత్ రెడ్డి క్షమాపణలు చెప్పడం గమనార్హం. సంస్థాన్ నారాయణపురం నుంచి చౌటుప్పల్ వరకు కాంగ్రెస్ నేతలు పాదయాత్ర నిర్వహించనున్నారు. ఈ పాదయాత్రలో టీపీసీసీ చీఫ్ రేవంత్ రెడ్డి, సీఎల్పీ నేత మల్లు భట్టివిక్రమార్క, మధుయాష్కీ తదితరులు పాల్గొననున్నారు. ఈ నెల 16న రేవంత్ రెడ్డి పాదయాత్రలో పాల్గొంటారు.