Revanth Reddy: పార్టీపై పట్టు బిగిస్తున్న రేవంత్.. సీనియర్లకు హస్తినలో చుక్కెదురు.. నిరాశతోనే..

టీపీసీసీ చీఫ్ రేవంత్ రెడ్డి తనదైన వ్యూహంతో ముందుకెళ్తున్నారు.. పార్టీపై పట్టు బిగిస్తున్నారు.. ఎప్పటికప్పుడు రాష్ట్ర పార్టీ వ్యవహారాలను అధిష్టానం దృష్టికి తీసుకెళ్తూ మెప్పు పొందిన ఆయన.. అసమ్మతి నేతలను దిక్కుతోచని స్థితిలో పడేశారు. రేవంత్ ఒంటెత్తు పోకడలకు పోతున్నారని.. సీనియర్లను అస్సలు పట్టించుకోవట్లేదంటూ కొందరు నేతలు అసమ్మతి రాగం వినిపించిన సంగతి తెలిసిందే.. ఈ క్రమంలోనే వారు వరస భేటీలు నిర్వహించి టీకాంగ్రెస్‌లో అలజడి రేపారు. దీంతో అలెర్టయిన అధిష్టానం అటువంటి సమావేశాలేవి నిర్వహించొద్దంటూ ఆదేశాలిచ్చింది..

ఈ నేపథ్యంలోనే ఆ సీనియర్ నేతలు హస్తిన బాట పట్టారు.. ఈ క్రమంలోనే అధిష్టానం వద్ద వారికి చుక్కెదురైంది.. రేవంత్‌కు వ్యతిరేకంగా కాంగ్రెస్‌ అధిష్టానం వద్ద అసమ్మతి స్వరం వినిపించాలని భావించిన కొందరు సీనియర్లు ప్రయత్నించి విఫలమయ్యారు.. రేవంత్‌పై ఫిర్యాదులు చేయాలనే ఉద్దేశంతో ఇటీవల ఢిల్లీకి వెళ్లిన సీనియర్‌ నేతలకు ఏఐసీసీ అధినేత్రి సోనియాగాంధీ, అగ్రనేత రాహుల్‌గాంధీ మాత్రమే కాకుండా.. పార్టీ ప్రధాన కార్యదర్శి కేసీ వేణుగోపాల్‌, రాష్ట్ర ఇన్‌చార్జి మాణిక్కం ఠాగూర్‌ కూడా అపాయింట్‌మెంట్‌ ఇవ్వడానికి నిరాకరించారు.. ఈ నేపథ్యంలోనే వారు నిరాశగా వెనుదిరిగారు..

ఇటు పార్టీ ఎంపీలు ఉత్తమ్‌కుమార్‌రెడ్డి, కోమటిరెడ్డి వెంకటరెడ్డి తమకు మద్దతిస్తారని ఈ నేతలు భావించగా.. వారు సహకరించలేదని సమాచారం. దీంతో చేసేదేమీ లేక తిరుగుముఖం పట్టినట్లు తెలిసింది.. సరిగ్గా వారు ఢిల్లీకి వచ్చిన సమయంలోనే రేవంత్‌రెడ్డి, కోమటిరెడ్డి వెంకటరెడ్డి కలిసి విలేకరుల సమావేశంలో మాట్లాడడంతో అసమ్మతి నేతలు కంగుతిన్నట్లు తెలిసింది. మరోవైపు ఏఐసీసీ ప్రధాన కార్యదర్శి పదవిని ఆశిస్తున్న ఉత్తమ్‌.. రాష్ట్ర పార్టీ వ్యవహారాల్లో తలదూర్చడం సరైంది కాదని భావించి సైలెంట్‌ అయినట్లు తెలుస్తోంది. దీంతో అసమ్మతి నేతలు దిక్కుతోచని స్థితిలో పడ్డారు..