TSRTCకి కొత్త ఛైర్మన్ నియామకం? ఆ ఎమ్మెల్యేకే అవకాశం..

తెలంగాణ ఆర్టీసీకి కొత్త ఛైర్మన్‌ను నియమించే అవకాశం ఉన్నట్లు తెలుస్తోంది. ఛైర్మన్‌గా నిజామాబాద్ రూరల్ ఎమ్మెల్యే బాజిరెడ్డి గోవర్ధన్‌ రెడ్డికి ఈ అవకాశం దక్కవచ్చని సమాచారం. ఇప్పటికే నామినేటెడ్‌ పోస్టుల భర్తీ కోసం కసరత్తు చేస్తున్న టీఆర్‌ఎస్‌ అగ్రనేతలు.. ఆర్టీసీ ఛైర్మన్‌ పదవిని బాజిరెడ్డికి ఇవ్వాలని భావిస్తున్నట్లు విశ్వసనీయ వర్గాల ద్వారా తెలిసింది. బాజిరెడ్డికి మంత్రివర్గంలోనే చోటు దక్కుతుందని తొలుత భావించారు. కానీ, కొన్ని అనివార్య కారణాల వల్ల ఆయనకు అమాత్య పదవి వరించలేదు. అప్పట్లో ఈ విషయం గురించి బాజిరెడ్డి ప్రశ్నించినా, భవిష్యత్తులో నామినేటెడ్ పోస్టు కేటాయిస్తామని అధిష్ఠానం భరోసా ఇచ్చినట్లు టీఆర్ఎస్ నాయకులు తెలిపారు.

అయితే, టీఎస్ ఆర్టీసీ చైర్మన్‌ పదవి అప్పుడే ఇవ్వాలనుకున్నా.. ఇందుకు బాజిరెడ్డి నిరాకరించినట్లు తెలిసింది. అప్పటికే రాష్ట్ర ఆర్టీసీ తీవ్ర నష్టాల్లో కూరుకొనిపోయి ఉండడం, ఆర్టీసీ కార్మికులు సమ్మెకు దిగుతామని అప్పటికే స్పష్టం చేయడంతో ఆయన విముఖత చూపారు. తెలంగాణ రాష్ట్ర పారిశ్రామిక మౌలిక సదుపాయాల సంస్థ, ఖనిజాభివృద్ధి సంస్థలపై బాజిరెడ్డి ఎక్కువ ఇష్టం కనబర్చారు. అయితే, ఆ సంస్థలకు పదవులు ఖాళీ లేవు. అప్పటికే ఛైర్మన్లు ఉన్నారు. బాజిరెడ్డి అభీష్టం మేరకు టీఆర్ఎస్ అధిష్ఠానం వాటిని కేటాయించలేక పోయింది.

Also Read: Disha హత్యాచార నిందితుల్లో ఇద్దరు మైనర్లు..! కానీ..

ప్రస్తుతం మారిన పరిస్థితుల వల్ల బాజిరెడ్డి ఆర్టీసీ ఛైర్మన్ పదవి అంగీకరించనున్నట్లు తెలిసింది. ఆర్టీసీ సమ్మె ముగియడం, కార్మికులకు ముఖ్యమంత్రి కేసీఆర్ వరాల జల్లు కురిపించడంతో ఆర్టీసీ సంస్థ సంక్షోభం నుంచి కాస్త గట్టెక్కింది. అదీకాక, ఆర్టీసీని ఆదుకొనేందుకు తక్షణం కొన్ని నిధులను కేసీఆర్ ప్రకటించారు. ప్రతి బడ్జెట్‌లోనూ నిర్దిష్ట మొత్తంలో నిధులు కేటాయిస్తామని ప్రకటించడంతో ఆ సంస్థకు కొంత ఊరట లభించినట్లయింది. దీంతో ఆర్టీసీ గాడిలో పడే అవకాశం ఉందన్న భావనతో ఉన్న బాజిరెడ్డి, ఛైర్మన్‌ పదవిని తీసుకొనేందుకు సుముఖంగా ఉన్నట్లు విశ్వసనీయ వర్గాల ద్వారా తెలిసింది.

Also Read: 9 నెలల పాప హత్యాచార కేసులో సుప్రీంకు పోలీసులు