GHMC Elections: బీజేపీపై యుద్ధం ఇక్కడి నుంచే మొదలు: కేసీఆర్

జీహెచ్ఎంసీ ఎన్నికల్లో నూరుశాతం విజయం మనమే విజయం సాధిస్తామని ముఖ్యమంత్రి కేసీఆర్ ధీమా వ్యక్తం చేశారు. అలా అని నేతలంతా నిర్లక్ష్యంగా ఉండకూడదని అన్నారు. తెలంగాణ భవన్‌లో సీఎం అధ్యక్షతన జరిగిన టీఆర్‌ఎస్‌ పార్లమెంటరీ పార్టీ, లెజిస్లేచర్‌ పార్టీ సమావేశం ముగిసింది. భేటీ ప్రారంభంలో ఇటీవల మరణించిన పార్టీ సీనియర్‌ నాయకుడు నాయిని నర్సింహారెడ్డి చిత్రపటానికి సీఎం నివాళి అర్పించారు. అంతా కాసేపు మౌనం పాటించారు. జీహెచ్‌ఎంసీ ఎన్నికల నేపథ్యంలో భేటీ సందర్భంగా సీఎం కేసీఆర్‌ పార్టీ నాయకులకు దిశా నిర్దేశం చేశారు.

బీజేపీ తప్పుడు ప్రచారాలను తిప్పికొట్టాలని కేసీఆర్ పిలుపునిచ్చారు. దేశంలో బీజేపీ చాలా దుర్మార్గంగా వ్యవహరిస్తోందని, బీజేపీపై హైదరాబాద్ నుంచే యుద్ధం ప్రకటిస్తామని ప్రకటించారు. ఎవరికి ఏ డివిజన్‌లో బాధ్యతలు అప్పగిస్తే.. ఆ డివిజన్‌లో బాధ్యులు గట్టిగా పనిచేయాలని ఆదేశించారు. ప్రభుత్వంపై, పార్టీపై బీజేపీ చేస్తోన్న విమర్శలను తిప్పికొట్టాలని కేసీఆర్ సూచించారు. ఈ సందర్భంలో కాంగ్రెస్‌ను అసలు పరిగణనలోకి తీసుకోవాల్సిన అవసరమే లేదని ఆయన కుండబద్దలు కొట్టారు. జీహెచ్‌ఎంసీ సర్వేలన్నీ తమకే అనుకూలంగా ఉన్నాయని, 110 డివిజన్‌లో టీఆర్‌ఎస్‌దే గెలుపని ఆ సర్వేలో తేలిందని సీఎం కేసీఆర్ ప్రకటించారు.

బీజేపీ వ్యతిరేక పార్టీలతో భేటీ..
డిసెంబర్‌ రెండో వారంలో బీజేపీ వ్యతిరేక పార్టీల నేతలతో హైదరాబాద్‌లోనే సమావేశం నిర్వహిస్తామని ప్రకటించారు. ఈ సమావేశానికి సీఎం మమతా బెనర్జీ, మాజీ సీఎంలు కుమార స్వామి, అఖిలేశ్ యాదవ్, మాయావతితో పాటు డీఎంకే అధ్యక్షుడు స్టాలిన్ కూడా హాజరుకానున్నారని ఆయన వెల్లడించారు.

వరద బాధితులకు సంబంధించి 2 లక్షల ద‌ర‌ఖాస్తులు వచ్చాయని, ఇప్పటివరకు లక్షా అరవై వేల ద‌ర‌ఖాస్తుల‌కు వ‌ర‌ద సాయం మంజూరు చేశామ‌ని అన్నారు. ప్ర‌స్తుతం ఎన్నిక‌ల కోడ్ అమల్లో ఉన్నందున మిగ‌తా వారికి ఎల‌క్షన్‌ల తర్వాత ఇస్తామ‌ని సీఎం చెప్పారు.