‘పుట్టుక మీది.. చావు మీది.. బతుకు తెలంగాణది’

తెలంగాణ సిద్దాంత కర్త, ప్రొఫెసర్ జయశంకర్ జయంతి సందర్భంగా ప్రముఖులు నివాళులు అర్పించారు. తెలంగాణ కోసమే పుట్టి, తెలంగాణ కోసమే బతికి, చివరికి తెలంగాణ రాష్ట్ర ఆవిర్భావాన్ని కళ్లారా చూడకుండానే కన్నుమూసిన ఆచార్యుడిని స్మరించుకుంటూ మంగళవారం (ఆగస్టు 6) ట్వీట్ చేశారు. టీఆర్ఎస్ పార్టీ వర్కింగ్ ప్రెసిడెంట్, ఎమ్మెల్యే కేటీఆర్‌తోపాటు మాజీ ఎంపీ కల్వకుంట్ల కవిత.. జయ శంకర్ సార్‌కు ట్విట్టర్ ద్వారా నివాళి అర్పించారు.
‘జయశంకర్ సార్ యాదిలో .. పుట్టుక మీది.. చావు మీది.. బతుకు తెలంగాణది’అని కేటీఆర్ ట్వీట్ చేశారు. ‘స్వరాష్ట్ర సాధన కోసం తన జీవితాన్ని అంకిత చేసిన మహనీయులు, తెలంగాణ స్ఫూర్తి ప్రదాత ఆచార్య కొత్తపల్లి జయశంకర్ సార్ జయంతి సందర్భంగా వారికి ఘన నివాళులు అర్పిస్తున్నాం’ అంటూ కేటీఆర్, కవిత.. జయశంకర్ ఫొటోను ట్విట్టర్‌లో షేర్ చేశారు.

పూలమాలతో హరీష్ రావు నివాళి..
మాజీ మంత్రి, టీఆర్ఎస్ ఎమ్మెల్యే హరీష్ రావు.. జయశంకర్ జయంతి సందర్భంగా ఆయణ్ని స్మరించుకున్నారు. ‘తెలంగాణ రాష్ట్ర సాధనకు పోరుబాట చూపి బంగారు తెలంగాణకు మార్గ దర్శనం చేసిన మహాత్మా శ్రీ కొత్తపల్లి జయశంకర్ సారుకు నివాళులు’ అంటూ ట్వీట్ చేశారు. జయశంకర్ విగ్రహానికి పూల మాల వేసి, నివాళి అర్పించారు.