రాష్ట్రవ్యాప్తంగా దళితబంధు అమలుకు రంగం సిద్ధం... కలెక్టర్లకు ఆదేశాలు

దళితుల అభ్యున్నతి కోసం ముఖ్యమంత్రి కేసీఆర్ ఎంతో ప్రతిష్టాత్మకంగా చేపట్టిన పథకం ‘దళితబంధు’. హుజురాబాద్‌లో పైలట్ ప్రాజెక్టుగా అమలు చేసిన ప్రభుత్వం... తాజాగా రాష్ట్రవ్యాప్తంగా దీన్ని అమలు చేసేందుకు రంగం సిద్ధం చేసింది. దళితబంధు అమలుపై కలెక్టర్లకు ప్రభుత్వం ఆదేశాలిచ్చిందని రాష్ట్ర సంక్షేమ శాఖ మంత్రి కొప్పుల ఈశ్వర్ తెలిపారు.

దళితబంధు అమలుపై శనివారం సీఎస్‌ సోమేశ్ కుమార్, జిల్లా కలెక్టర్లు, అదనపు కలెక్టర్లతో ఆయన వీడియో కాన్ఫరెన్స్ నిర్వహించారు. ప్రతి నియోజకవర్గంలో ఎమ్మెల్యేల సలహాలతో 100 మంది లబ్ధిదారుల జాబితాను సిద్ధం చేయనున్నట్టు వెల్లడించారు. వీరికి బ్యాంకు లింక్‌తో సంబంధం లేకుండా రూ.10 లక్షలు ఆర్థిక సాయం చేయనున్నట్టు తెలిపారు. లబ్ధిదారుడు కోరుకున్న యూనిట్‌ను ఎంపిక చేసుకోవచ్చని పేర్కొన్నారు. ఈ ఆర్థిక సంవత్సరంలో దళితబంధుకు రూ.1200 కోట్లు కేటాయించామని, అందులో ఇప్పటికే రూ.100 కోట్లు విడుదల చేశామన్నారు. మిగిలిన మొత్తాన్ని విడతల వారీగా విడుదల చేస్తామని ప్రకటించారు. ఇప్పటికే వాసాలమర్రి, హుజురాబాద్‌లో దళితబంధు అమలు అవుతోంది. శుక్రవారం కరీంనగర్‌లో మంత్రి గంగుల కమలాకర్ యూనిట్ల వారీగా లబ్ధిదారులకు వాహనాలను అందజేశారు.