Ramzan Offer: ప్రయాణికులకు టీఎస్ఆర్టీసీ రంజాన్ స్పెషల్ ఆఫర్

రంజాన్ సందర్భంగా ప్రయాణికులకు తెలంగాణ రాష్ట్ర రోడ్డు రవాణా సంస్థ (టీఎస్ఆర్టీసీ) శుభవార్త ప్రకటించింది. కార్గో సర్వీసు చార్జీలపై 25 శాతం డిస్కౌంట్ ప్రకటిస్తున్నట్లు ఆ సంస్థ ఎండీ వీసీ సజ్జనార్ తాజాగా వెల్లడించారు. ఆర్టీసీని గాడిన పెట్టేందుకు ఎండీగా బాధ్యతలు చేపట్టినప్పటి నుంచి సజ్జనార్ వినూత్న పథకాలు ప్రవేశపెడుతూ ముందుకెళ్తున్నారు. ముఖ్యంగా పండుగలు, ప్రత్యేక దినాల్లో స్పెషల్ ఆఫర్స్ పేరుతో డిస్కౌంట్లను ప్రకటిస్తూ ప్రజలకు ఆర్టీసీని మరింత చేరువ చేస్తున్నారు.

ఈ క్రమంలోనే తాజాగా రంజాన్ మాసం నేపథ్యంలో ప్రయాణికులకు మరో శుభవార్త చెప్పారు సజ్జనార్. ఆర్టీసీకి సంబంధించిన కార్గో, పార్సిల్ చార్జీలపై 25 శాతం తగ్గింపు అందుబాటులో ఉంటుందని తెలిపారు. అయితే ఈ నెల 24 నుంచి మే 3 వరకు మాత్రమే ఈ ఆఫర్ అందుబాటులో ఉంటుందని వివరించారు. ప్రయాణికులు మరిన్ని వివరాలకు 040-30102829, 68153333 నంబర్లను సంప్రదించాలని సజ్జనార్ ట్వీట్ చేశారు. ‘పవిత్ర రంజాన్‌ పండగ సందర్భంగా మీ ప్రియమైన వారితో కనెక్ట్‌ అవ్వండి. వారికి ఇష్టమైన దుస్తులు, బహుమతులు, స్వీట్లు, పండ్లు, డ్రైఫ్రూట్స్‌, సేమ్యా, ఖర్జూరాలు తదితర వస్తువులు ఆర్టీసీ ద్వారా పంపించండి. హ్యాపీ రంజాన్‌..’ అని అందులో ఆయన రాసుకొచ్చారు.

తెలంగాణలో మరో ‘పుష్ప’.. భర్త గొంతు కోసిన నవ వధువు
ఇప్పటికే ఎన్నో ఆఫర్లను ప్రకటించిన సజ్జనార్.. హైదరాబాద్‌లో 24 గంటల ప్రయాణానికి టీ24 పేరుతో ప్రత్యేకంగా టికెట్ తెచ్చిన సంగతి తెలిసిందే.. లీటర్ పెట్రోల్ తక్కువ ఖర్చు అని, ఈ సదుపాయాన్ని వినియోగించుకోవాలని సూచించడంతో మంచి స్పందన వచ్చింది. ఇక తాజాగా ప్రకటించిన ఈ 25 శాతం డిస్కౌంట్‌ ఆఫర్‌‌కు ఎలాంటి స్పందన వస్తుందో వేచి చూడాలి.