తెలంగాణలో తగ్గిన నిరుద్యోగం.. జాతీయ సగటు కంటే తక్కువగా..!

తెలంగాణలో నిరుద్యోగ సమస్య ఎక్కువగా ఉందనేది చాలా మంది అభిప్రాయం. కానీ జాతీయ సగటుతో పోలిస్తే.. రాష్ట్రంలో నిరుద్యోగ రేటు తక్కువగా నమోదవుతోంది. గత జనవరి నెలలో తెలుగు రాష్ట్రాల్లో నిరుద్యోగ రేటు జాతీయ నిరుద్యోగ రేటుతో పోలిస్తే రెండు శాతం తక్కువగా నమోదు కావడం గమనార్హం. సెంటర్ ఫర్ మానిటరింగ్ ఇండియన్ ఎకానమీస్ సర్వే ఆన్ అన్‌ఎంప్లాయిమెంట్ రేట్ ఇన్ ది స్టేట్స్‌లో ఈ విషయం వెల్లడైంది.

జనవరిలో ఏపీ, తెలంగాణాల్లో నిరుద్యోగ రేటు 4.5 శాతంగా ఉంది. ఇదే సమయంలో దేశ నిరుద్యోగ రేటు 6.5 శాతం కావడం గమనార్హం. డిసెంబర్ 2020లో ఏపీ నిరుద్యోగ రేటు 6.7 శాతంగా ఉండగా.. జనవరి నెలలో అది 4.5 శాతానికి తగ్గిపోయింది. గతేడాది డిసెంబర్లో తెలంగాణ నిరుద్యోగ రేటు 7 శాతంగా నమోదు కాగా.. జనవరి నాటికి అది 4.5 శాతానికి తగ్గడం ఊరటనిస్తోంది.

గణాంకాలు ఈ విషయాన్ని వెల్లడిస్తున్నప్పటికీ.. క్షేత్ర స్థాయిలో ఇందుకు భిన్నమైన వాతావరణం ఉందనే భావన వ్యక్తమవుతోంది. అర్హతలకు తగిన ఉద్యోగాలు లభించకపోవడంతో చాలా మంది చిన్నపాటి ప్రయివేట్ ఉద్యోగాలతో సరిపెట్టుకుంటున్నారు. మరి కొందరు ఏళ్ల తరబడి ప్రభుత్వ ఉద్యోగాలకు ఎదురు చూస్తూ.. నిరుద్యోగులుగానే మిగిలిపోతున్నారు.

తాము మళ్లీ అధికారంలోకి వస్తే నిరుద్యోగ భృతి ఇస్తామని 2018 ఎన్నికల్లో టీఆర్ఎస్ ప్రకటించింది. కానీ ఇప్పటి వరకూ రాష్ట్రంలో నిరుద్యోగ భృతి అమలు కాలేదు. నిరుద్యోగ భృతి అందడానికి మరో ఏడాది సమయం పట్టే అవకాశం ఉంది.