ఫాస్ట్‌ఫుడ్ సెంటర్‌పై రౌడీల దాడి.. నిర్వహకులను చితకబాది దారుణం.. వీడియో

హైదరాబాద్‌లో రౌడీ మూకలు రెచ్చిపోయారు. ఓ ఫాస్ట్ ఫుడ్ సెంటర్‌పై కొందరు గుర్తు తెలియని వ్యక్తులు దాడికి పాల్పడ్డారు. ఈ ఘటన ఆలస్యంగా వెలుగులోకి వచ్చింది. హైదరాబాద్‌లోని చిక్కడపల్లి పోలీస్ స్టేషన్ పరిధిలో ఉన్న స్పైస్ కోర్ట్ అనే ఫాస్ట్ ఫుడ్ సెంటర్‌పై గుర్తు తెలియని వ్యక్తులు దాడి చేశారు. ముఖాలకు మాస్కులు ధరించి ఫాస్ట్‌ఫుడ్ సెంటర్‌పై మూకుమ్మడి దాడి చేశారు. నిర్వహకులను ఇష్టం వచ్చినట్లుగా కర్రలతో చితకబాదారు. ఆరుగురు వ్యక్తులు ఒక్కసారిగా ఫాస్ట్ ఫుడ్ సెంటర్‌పై దాడి చేసి అక్కడ ఉన్న సీసీటీవీ కెమెరాలు అద్దాలు, ఫర్నిచర్ ధ్వంసం చేసి అక్కడి నుంచి పరారయ్యారు.

అయితే, ఈ దృశ్యాలన్నీ సీసీటీవీ కెమెరాల్లో రికార్డయ్యాయి. బాధితులు వెంటనే చిక్కడపల్లి పోలీస్ స్టేషన్‌లో ఫిర్యాదు చేశారు. వ్యాపార లావాదేవీల విషయంలో దాడికి పాల్పడ్డారా లేక పాత కక్షలు ఏమైనా ఉన్నాయా అనే కోణంలో పోలీసులు దర్యాప్తు చేస్తున్నారు.