వరద బాధితులకు కిషన్ రెడ్డి 3 నెలల జీతం విరాళం

రాష్ట్రవ్యాప్తంగా వరుసగా కురుస్తున్న భారీ వర్షాలకు హైదరబాద్‌ నగరం అతలాకుతలం అవుతున్న సంగతి తెలిసిందే. ఈ క్రమంలో వరద బాధితులకు సాయం చేసేందుకు టాలీవుడ్ సెలబ్రిటీలు సహా ప్రముఖులు ముందుకు వస్తున్నారు. తాజాగా కేంద్ర హోంశాఖ సహాయ మంత్రి కిషన్ రెడ్డి సైతం ఉదారత చాటారు. బాధితులను ఆదుకునేందుకు కిషన్‌రెడ్డి తన మూడు నెలల జీతాన్ని విరాళంగా ప్రకటించారు.

ఇప్పటికే తమ వంతు సాయం కింద టాలీవుడ్‌ చిత్ర పరిశ్రమకు చెందిన ఆగ్ర హీరోలు సీఎం సహాయ నిధికి విరాళాలు ప్రకటించారు. అంతేగాక పలు రాజకీయ నేతలు కూడా తమ వంతు సాయం ప్రకటిస్తున్నారు. ఇతర రాష్ర్టాల ముఖ్యమంత్రులు సైతం స్వచ్ఛందంగా ముందుకొచ్చి విరాళాలు ప్రకటించారు. దిల్లీ ముఖ్యమంత్రి అరవింద్ కేజ్రీవాల్, తమిళనాడు ముఖ్యమంత్రి పళనిస్వామి, పశ్చిమ బంగాల్ ముఖ్యమంత్రి మమతా బెనర్జీ ఇప్పటికే వరద బాధితులకు విరాళాలు ప్రకటించారు.

వరద తాకిడితో పట్టణంలోని పలు కాలనీలు పెద్ద కాలువలను తలపిస్తున్నాయి. ఇళ్లల్లోకి నీరు చేరడంతో చాలా చోట్ల అడుగు బయట పెట్టలేని పరిస్థితులు నెలకొన్నాయి. హైదరాబాద్‌ వరదల వల్ల సామాన్య జనం నుంచి ధనిక ప్రజల వరకు నిత్యావసర సరకులు లేక తీవ్ర ఇబ్బందులు ఎదుర్కొంటున్నారు. దీంతో వరద బాధితులకు తక్షణ ఉపశమనం కింద తెలంగాణ ప్రభుత్వం రూ.550 కోట్లు ప్రకటించిన విషయం తెలిసిందే.