సీఎం కేసీఆర్‌కు డొనాల్డ్ ట్రంప్ ప్రశంస

అగ్రరాజ్య అధ్యక్షుడు డొనాల్డ్ ట్రంప్.. ముఖ్యమంత్రి కేసీఆర్‌ను అభినందించారు. ప్రపంచ పారిశ్రామికవేత్తల శిఖరాగ్ర సదస్సు (జీఈఎస్‌)కు మీ ఆతిథ్యం బాగుందని ట్రంప్‌ కితాబిచ్చారు. అమెరికా అధ్యక్షుడు ట్రంప్ గౌరవార్థం రాష్ట్రపతి భవన్‌లో మంగళవారం (ఫిబ్రవరి 25) రాత్రి ప్రత్యేక విందు ఏర్పాటు చేసిన విషయం తెలిసిందే. ఈ విందు కార్యక్రమంలో తెలంగాణ సీఎం కేసీఆర్ పాల్గొన్నారు.

విందు కార్యక్రమానికి హాజరైన అతిథులందరినీ రాష్ట్రపతి రామ్‌నాథ్ కోవింద్, ప్రధాని మోదీ.. ట్రంప్‌కు పరిచయం చేశారు. ఈ సందర్భంగా సీఎం కేసీఆర్‌తో ట్రంప్ కరచాలనం చేశారు. కేసీఆర్‌తో ఆప్యాయంగా మాట్లాడిన ట్రంప్.. జీఈఎస్‌ గురించి ప్రస్తావించారు. ఈ సందర్భంగా కేసీఆర్‌ మాట్లాడుతూ.. ‘సదస్సుకు మీరు హాజరవుతారని భావించాం. ఇవాంక వచ్చి ప్రత్యేక ఆకర్షణగా నిలిచారు’ అని పేర్కొన్నట్లు సమాచారం. దీనికి ట్రంప్ బదులిస్తూ.. సదస్సుకు రావాలని తాను ప్రయత్నించినా, సాధ్యం కాలేదని చెప్పినట్లు తెలుస్తోంది.

Must Read: మెట్రో రెండో దశపై కీలక ప్రకటన.. తిరుమల ప్రాజెక్టుపై సర్వే

అమెరికా అధ్యక్షుడు డొనాల్డ్ ట్రంప్‌కు సీఎం కేసీఆర్‌ ప్రత్యేక బహుమతులను అందజేశారు. చార్మినార్‌ కళాకృతిని బహూకరించినట్లు తెలుస్తోంది. అమెరికా ప్రథమ మహిళ, ట్రంప్ సతీమణి మెలనియాకు ఎర్రరంగు పోచంపల్లి పట్టుచీరను బహూకరించినట్లు సమాచారం. చార్మినార్‌ కళాకృతిని కరీంనగర్‌ ఫిలిగ్రీ కళాకారులు రూపొందించారు. దీంతో పాటు నెమలి, కాకతీయ కళాతోరణం, వీణ లాంటి ఆకృతులను తీర్చిదిద్దారు.

2017 నవంబర్ 28, 29 తేదీల్లో హైదరాబాద్‌లో ప్రపంచ పారిశ్రామికవేత్తల సదస్సు (జీఈఎస్) జరిగింది. ఈ సదస్సులో ట్రంప్ కుమార్తె ఇవాంక ప్రత్యేక ఆకర్షణగా నిలిచారు. హెచ్ఐసీసీ వేదికగా నిర్వహించిన జీఈఎస్ సదస్సులో 2017 నవంబర్ 29న ‘మహిళా పారిశ్రామికవేత్తల్లో నైపుణ్యం పెంపు’ అంశంపై జరిగిన ప్లీనరీలో ఆమె పాల్గొన్నారు. దీనికి మంత్రి కేటీఆర్ సమన్వయకర్తగా వ్యవహరించగా.. ఇవాంక ట్రంప్‌తో పాటు ఐసీఐసీఐ బ్యాంకు ఎండీ చందా కొచ్చార్, బ్రిటన్ మాజీ ప్రధాని టోనీ బ్లెయర్ సతీమణి చెర్రీ బ్లెయర్, డెల్ ఈఎంసీ కరేన్ క్వింటోస్ ప్యానలిస్టులుగా పాల్గొన్నారు.

Also Read: తండ్రి కారు కింద నలిగి చిన్నారి మృతి