సీఎం సొంత నియోజకవర్గంలోనే దారుణం.. ఉత్తమ్ విమర్శలు

సీఎం కేసీఆర్‌ సొంత నియోజకవర్గంలోని వర్గల్‌ మండలం వేలూరు గ్రామంలో దళితుడైన బ్లాగరి నర్సింహులు అనే రైతు ఆత్మహత్య చేసుకోవడం అత్యంత బాధాకరమని టీపీసీసీ చీఫ్‌ ఉత్తమ్‌ కుమార్‌ రెడ్డి అన్నారు. రైతు నర్సింహులు మృతికి కారణమైన వారిపై హత్య, ఎస్సీ, ఎస్టీ వేధింపుల కేసులు నమోదు చేయాలని ఉత్తమ్ కుమార్ రెడ్డి డిమాండ్‌ చేశారు. ఈ మేరకు గురువారం ఉత్తమ్‌ కుమార్ రెడ్డి ఓ ప్రకటన విడుదల చేశారు. దళితులపై దాడులు పెరుగుతున్నాయని ఉత్తమ్ కుమార్ రెడ్డి అన్నారు.

‘‘సీఎం కేసీఆర్‌ నియోజకవర్గంలోనే ఇంత దారుణమా? అని ప్రశ్నించారు. దళితుడిని ముఖ్యమంత్రిని చేస్తానన్న కేసీఆర్‌ వారిని బలి తీసుకుంటున్నారని ఉత్తమ్ అన్నారు. టీఆర్ఎస్ ప్రభుత్వం దిగిపోయేంత వరకూ దళితులకు న్యాయం జరగబోదని అన్నారు. దళిత, బడుగు, బలహీన వర్గాలు ఏకం కావాలని ఈ సందర్భంగా ఉత్తమ్‌ పిలుపునిచ్చారు.

నర్సింహులకు చెందిన 13 గుంటల భూమిని బలవంతంగా రైతు వేదిక నిర్మాణానికి తీసుకుంటున్నారనే ఆవేదనతో బుధవారం పురుగులమందు తాగి ఆ‍త్మహత్యకు పాల్పడ్డాడు. వెంటనే స్థానికులు అతన్ని గజ్వేల్ ఆసుపత్రికి తరలించారు. అక్కడ ప్రథమ చికిత్స చేసి అనంతరం సిద్దిపేట ప్రభుత్వ ఆసుపత్రికి తీసుకెళ్లారు. గురువారం ఉదయం 3 గంటలకు నర్సింహులు చికిత్స పొందుతూ మృతిచెందాడు.