టీపీసీపీ చీఫ్ పదవికి ఉత్తమ్ రాజీనామా

తెలంగాణ ప్రదేశ్ కాంగ్రెస్ కమిటీ అధ్యక్ష పదవికి ఉత్తమ్ కుమార్ రెడ్డి రాజీనామా చేశారు. ఏఐసీసీకి ఆయన ఈ మేరకు లేఖ రాశారు. గతంలోనే ఆయన అధ్యక్ష పదవికి రాజీనామా చేశానని ఆమోదించాలని లేఖలో పేర్కొన్నారు. గ్రేటర్ ఎన్నికల్లో ఓటమికి బాధ్యత వహిస్తూ... రాజీనామా చేసినట్లు లేఖలో ఉత్తమ్ పేర్కొన్నారు. కొత్త పీసీసీ చీఫ్ ప్రక్రియను ప్రారంభించాలని కూడా ఉత్తమ్ లేఖలో పేర్కొన్నారు. కాంగ్రెస్ పార్టీ గ్రేటర్‌లో జరిగిన తాజా ఎన్నికల్లో కేవలం రెండు స్థానాల్లో మాత్రమే విజయం సాధించారు. ఉప్పల్, ఏఎస్‌రావునగర్‌లో ఇద్దరు కాంగ్రెస్ అభ్యర్థులు గెలుపొందారు.

ఫిబ్రవరి 2015 నుంచి ఉత్తమ్‌ టీపీసీసీ అధ్యక్షుడిగా కొనసాగుతున్నారు. ప్రస్తుతం ఆయన నల్లగొండ పార్లమెంట్‌ నియోజకవర్గం నుండి లోక్‌సభకు ప్రాతినిధ్యం వహిస్తున్న సంగతి తెలిసిందే. అయితే గత కొంతకాలంగా ఆయన పార్టీ అధ్యక్ష పదవి విషయంలో అసంతృప్తిగానే ఉన్నారు. పార్టీ వరుస ఓటములతో పదవికి రాజీనామా చేయాలని భావించారు. గతంలో కూడా పీసీసీ చీఫ్ పదవికి రాజీనామా చేసినట్లు ప్రస్తుత రాజీనామా లేఖలో పేర్కొన్నారు.

ఉత్తమ్ కుమార్ రెడ్డి తొలిసారిగా 1994లో కోదాడ అసెంబ్లీ స్థానం నుంచి కాంగ్రెస్‌ అభ్యర్థిగా పోటీ చేసి ఓడిపోయారు. ఆతర్వాత 1999 అసెంబ్లీ ఎన్నికల్లో కోదాడ నుండి కాంగ్రెస్‌ అభ్యర్థిగా పోటీ చేసి గెలిచి తొలిసారి అసెంబ్లీలో అడుగుపెట్టారు. 2004 శాసనసభ ఎన్నికలలో కోదాడ నుండి రెండవసారి ఎమ్మెల్యే గా ఎన్నికయ్యారు. అసెంబ్లీ నియోజకవర్గాల పునర్విభజనలో భాగంగా నూతనంగా ఏర్పడ్డ హుజూర్‌నగర్‌ అసెంబ్లీ స్థానం నుంచి 2009 లో కాంగ్రెస్ పార్టీ నుండి పోటీ చేసి గెలిచారు. తెలంగాణ రాష్ట్రం ఏర్పాటు అయ్యాక 2014, 2018 ఎన్నికల్లో పోటీ చేసి గెలుపొందారు. ఉమ్మడి ఆంధ్రప్రదేశ్ రాష్ట్రంలో శాసనసభ డిప్యూటీ స్పీకర్ గా కూడా పనిచేశారు. 2019 పార్లమెంట్ ఎన్నికల్లో నల్లగొండ లోక్‌సభ స్థానంలో కాంగ్రెస్‌ పార్టీ తరపున పోటీ చేసి టీఆర్‌ఎస్‌ అభ్యర్థిపై గెలుపొందారు.