మార్కెట్‌లో మండిపోతున్న కూరగాయల ధరలు

మార్కెట్‌లో నిత్యావసరాల ధరలు జనాలకు చుక్కలు చూపిస్తున్నాయి. ఇప్పటికే కరోనా కారణంగా సగం సగం చాలి చాలని జీతాలతో నెట్టుకొస్తున్న మధ్యతరగతి ప్రజలకు, ఉపాధి కోల్పోయిన నిరుపేదలకు కూరగయాలు ధరలు దడ పుట్టిస్తున్నాయి. కరోనా కారణంగా ఇప్పటికే తీవ్ర సంక్షోభాన్ని ఎదుర్కొంటున్న ప్రజలకు పెరిగిన కూరగాయల ధరలు మరింత ఇబ్బందులు తెచ్చిపెడుతున్నాయి. నెల క్రితం రూ.100కే అన్నిరకాల కూరగాయలు దొరికే పరిస్థితి. కాని ఇప్పుడు మాత్రం 100కు రెండు మూడు రకాలు కూడా రాని పరిస్థితి నెలకొంది. కిలో టమాటా ధరనే.. రూ. 60గా ఉంది. బీరకాయ కూడా అలాగే ఉంది. ఇక బెండకాయ రూ. 40పైనే ఉంది.

గత నెలతో పోలిస్తే శుక్రవారం టమాటా ధర మూడు రెట్లు పెరిగింది. జూన్‌లో కేజీ టమాటా రూ.18 ఉండగా ప్రస్తుతం రూ.60 ఉంది. కొన్నిచోట్ల రూ.75 కూడా విక్రయిస్తున్నారు. ఆలుగడ్డ, క్యారెట్‌, బీరకాయ, బీన్స్ ధర కూడా కేజీ రూ. 50 నుంచి 60 వరకు పలుకుతోంది.
రైతు బజార్లతో పాటు... కాలనీలో పెట్టిన వారంతపు మార్కెట్లలో కూడా కూరగాయలు ధరలు మండిపోతున్నాయి. అటు ఆన్ లైన్ లో కూడా వెజిటేబుల్ ధరలు ఇలాగే ఉన్నాయి.

మండిపోతున్న కూరగాయల ధలరపై వ్యవసాయ మార్కటింగ్ శాఖ అధికారులు కూడా స్పందించారు. ప్రస్తుతమున్న సీజన్‌లో కూరగాయలు పండవన్నారు. తెలంగాణ రాష్ట్రానికి ఇతర ప్రాంతాల నుంచి కూరగాయలు వచ్చేవి. కానీ ప్రస్తుతం లాక్‌డౌన్‌ కారణంగా రావడం లేదు. ఆ కారణంగానే కూరగాయల ధరలు పెరిగాయని అధికారులు చెబుతున్నారు. మరోవైపు కరోనా విస్తరిస్తున్న సమయంలో మధ్యతరగతి, పేద కుటుంబాల ప్రజల పెరగుతున్న నిత్యావసరాల ధరల ఖర్చును భరించలేకపోతున్నారు. నిరుపేదల పరిస్థితి మరింత దయనీయంగా మారింది. లాక్‌డౌన్‌ కారణంగా నిన్నటి వరకు పనుల్లేక నానా తంటాలు పడిన కూలీలు కూరగాయల ధరలు ఆకాశన్నంటడంతో మూడు పూటలా తిండి తినలేని పరిస్థితి ఉంది.