హైదరాబాద్‌లోనే ఉప రాష్ట్రపతి వెంకయ్య దీపావళి వేడుకలు

ఉప రాష్ట్రపతి వెంకయ్యనాయుడు ఈసారి దీపావళి వేడుకలను హైదరాబాద్‌లోనే జరుపుకొన్నారు. హైదరాబాద్‌లో నివాసం ఉండే ఆయన కుమారుడి ఇంట్లోనే దీపాలు వెలిగించారు. భార్య ఉషా నాయుడుతో కలిసి వెంకయ్యనాయుడు దీపాలు వెలిగించి దీపావళి జరుపుకున్నారు. ఈ కార్యక్రమంలో కుటుంబ సభ్యులు కూడా పాల్గొన్నారు. దీపం వెలుగులతో చీకటి మాయమైనట్లేనని.. దీపావళి కాంతులతో అందరి జీవితాల్లో మంచి మార్పు రావాలని వెంకయ్య ఆకాంక్షించారు. చెడుపై మంచి సాధించిన విజయంగా జరుపుకొనే ఈ దీపావళి స్ఫూర్తితో అందరం ఆత్మస్థైర్యాన్ని పొందాలని అన్నారు. ఆత్మనిర్భర భారత్‌ నిర్మాణం దిశగా కంకణబద్ధులమవుదామని ట్వీట్ చేశారు.

‘‘ప్రధాని నరేంద్ర మోదీ సూచించినట్టుగా ఈసారి దీపావళి సందర్భంగా జవాన్ల త్యాగాన్ని గౌరవిస్తూ.. వారి కోసం ఒక దీపాన్ని వెలిగించి వారికి సంఘీభావాన్ని తెలియజేద్దాం’’ అని ఉపరాష్ట్రపతి పిలుపునిచ్చారు. ‘‘దీపం జ్యోతి పరఃబ్రహ్మ.. దీపం సర్వతమోపహమ్.. దీపేన సాధ్యతే సర్వం.. సంధ్యాదీపం నమోస్తుతే’’ అని ప్రార్థించారు.