కామారెడ్డి: కరోనా పోవాలని ఊరంతా ఖాళీ.. మళ్లీ రాత్రికి..

కరోనా వైరస్ మహమ్మారి తమను పూర్తిగా వదిలిపోవాలని గ్రామాల్లో ఇంకా మూఢనమ్మకాలు నమ్ముతున్నారు. తాజాగా కామారెడ్డి జిల్లాలోని ఓ గ్రామం మొత్తం ఈ మూఢ నమ్మకాన్ని పాటించింది. వైరస్‌ను పారద్రోలాలనే లక్ష్యంతో ఊరి జనమంతా కలిసి తమ ఇళ్లను ఖాళీ చేసి దూరంగా వన భోజనాలకు వెళ్లారు. కామారెడ్డి జిల్లా బీబీపేట మండల కేంద్రంలో ఈ వ్యవహారం వెలుగు చూసింది.

కరోనా నేపథ్యంలో ఆదివారం కూడా జనాలు అందరూ ఊరు విడిచి బయట ఉండాలని నిర్ణయించారు. అంతకు ముందు గ్రామ దేవతలకు ఘనంగా పూజలు నిర్వహించారు. గ్రామ దేవతను డప్పు వాయిద్యాలతో ఊరంతా ఊరేగించారు. ఆ తర్వాత గ్రామం విడిచి వన భోజనాలకు వెళ్లారు. మళ్లీ రాత్రిలోగా ఊళ్ళోకి రావాలని అందరూ అనుకున్నారు. ఇలా చేస్తే గ్రామ దేవతలు తమను కరోనా బారి నుంచి కాపాడతారని నమ్ముతున్నారు. తమను ఎలాంటి వ్యాధులు దరి చేరకుండా దేవతలు ఆశీర్వదిస్తారని బీబీపేట ఊరి వాసులు విశ్వసిస్తున్నారు. కామారెడ్డి జిల్లాలో మరో రెండు గ్రామాలు నిజామాబాద్ జిల్లాలో ఒక గ్రామం లోనూ ఇలాంటి కట్టుబాట్లే కనిపించాయి.