9 నెలల పాప హత్యాచార కేసులో సుప్రీంకు పోలీసులు

వరంగల్‌లో తొమ్మిది నెలల చిన్నారిని హతమార్చిన నిందితుడికి శిక్ష తగ్గింపుపై వరంగల్‌ పోలీస్‌ కమిషనరేట్‌ పోలీసులు సుప్రీం కోర్టును ఆశ్రయించారు.. ఈ మేరకు పోలీస్‌ కమిషనర్‌ డాక్టర్ వి. రవీందర్‌ సోమవారం ప్రకటించారు. హన్మకొండ పోలీస్‌ స్టేషన్‌ పరిధిలో తొమ్మిది నెలల చిన్నారిపై ఆత్యాచారం, హత్యకు పాల్పడిన నిందితుడు పోలేపాక ప్రవీణ్‌కు మరణశిక్షను విధిస్తూ కొన్ని నెలల క్రితం వరంగల్‌ ప్రత్యేక కోర్టు కోర్టు తీర్పు వెలువరించిన సంగతి తెలిసిందే. ఈ తీర్పును సవాలు చేస్తూ నిందితుడు హైకోర్టును ఆశ్రయించాడు. దీంతో వరంగల్‌ ప్రత్యేక కోర్టు ఇచ్చిన మరణ శిక్ష తీర్పుపై పూర్వపరాలను పరిశీలించిన హైకోర్టు ప్రవీణ్‌కు విధించిన మరణ శిక్షను జీవిత ఖైదుగా సవరించింది.

హైకోర్టు ఇచ్చిన తీర్పును సవాల్‌ చేస్తూ ఆ తీర్పుపై వరంగల్‌ కమిషనరేట్‌ పోలీసులు సుప్రీంకోర్టులో స్పెషల్‌ లీవ్‌ పిటిషన్‌ వేస్తున్నట్లుగా సోమవారం ప్రకటించారు. ఈ ఏడాది జూన్‌ 19న అర్ధరాత్రి హన్మకొండలో 9 నెలల చిన్నారిపై అత్యాచారం, హత్య జరిగిన విషయం తెలిసిందే.

Also Read: అమిత్ షాను హిట్లర్‌తో పోల్చిన అసదుద్దీన్.. లోక్‌సభలో కంటతడి, పౌరసత్వ బిల్లు ప్రతుల చించివేత

ఆ రోజు సంచలనం సృష్టించిన ఈ దుర్ఘటనలో బాలికలపై లైంగిక దాడుల కేసుల విచారణ ప్రత్యేక కోర్టు, నిందితుడు పోలెపాక ప్రవీణ్‌కు ఉరి శిక్ష విధించింది. ఈ తీర్పును సవాలు చేస్తూ నిందితుడు ఇటీవల హైకోర్టును ఆశ్రయించాడు. ఈ పిటిషన్‌ను పరిశీలించిన న్యాయస్థానం శిక్షను తగ్గిస్తూ నిందితుడు మరణించే వరకు జైలులోనే ఉండాలని కొత్త తీర్పు వెలువరించింది. తాజాగా ఈ తీర్పును సవాలు చేస్తూ సుప్రీంకోర్టుకు వెళ్లనున్నట్లు వరంగల్‌ పోలీసులు ప్రకటించడం ప్రాధాన్యం సంతరించుకుంది. నిందితుడికి హైకోర్టు శిక్ష తగ్గించడంపై పలువురు అసహనం వ్యక్తం చేశారు.

Also Read: మంత్రి కేటీఆర్‌తో సౌదీ రాయబారి భేటీ.. కీలక ప్రతిపాదన