KCR సార్.. మరి ఈ హామీల అమలు ఎప్పుడు?

తెలంగాణ సర్కారు హామీలన్నీ నెరవేరుస్తోంది. గ్రేటర్ హైదరాబాద్ ఎన్నికల ముందు నగర వాసులందరికీ ఉచితంగా తాగునీరు అందిస్తామని కేసీఆర్ హామీ ఇచ్చారు. తాజాగా ఉచిత తాగునీటి పథకాన్ని మంత్రి కేటీఆర్ ప్రారంభించారు. ఈ పథకం ద్వారా గ్రేటర్ హైదరాబాద్‌లో 10 లక్షల 8 వేల నల్లా కనెక్షన్లకు ఉచిత తాగునీరు అందుతుంది. ఉచిత తాగు నీరు కావాలంటే మార్చి 31 లోపు తప్పనిసరిగా మీటర్లను ఏర్పాటు చేసుకోవాల్సి ఉంటుంది. మురికివాడలు, బస్తీ ప్రజలకు మీటర్ అవసరం లేదు. కాలనీలు, అపార్ట్‌మెంటల్లో నీటి వినియోగం 20 వేల లీటర్లు దాటితే బిల్లు కట్టాల్సి ఉంటుంది.

రైతు బంధు, వ్యవసాయానికి ఉచిత విద్యుత్, ఆసరా ఫించన్లు తదితర సంక్షేమ పథకాలెన్నింటినో టీఆర్ఎస్ సర్కారు అమలు చేస్తోంది. దుబ్బాక, జీహెచ్ఎంసీ ఎన్నికల తర్వాత టీఆర్ఎస్ సర్కారు.. ప్రజాభిలాషకు అనుగుణంగా పాలన చేపట్టేందుకు ప్రయత్నిస్తోంది. ప్రజల నుంచి వ్యతిరేకత రావడంతో ఎల్‌ఆర్ఎస్‌‌ను రద్దు చేస్తున్నట్లు ప్రకటించింది.

2018 ఎన్నికల సందర్భంగా టీఆర్ఎస్ అనేక హామీలను గుప్పించింది. వృద్ధాప్య పింఛన్ అర్హత వయసును 57 ఏళ్లకు తగ్గిస్తామని హామీ ఇచ్చింది. దుబ్బాక ఉపఎన్నిక ముందు సిద్ధిపేట జిల్లాలో ఫించన్ల అర్హత వయసును తగ్గించారు. కానీ ఆ తర్వాత మిగతా జిల్లాల్లో మాత్రం దీన్ని అమలు చేయలేదు. రైతు రుణాలను మాఫీ చేయడానికి కూడా ప్రభుత్వం కిందా మీదా పడుతోంది.

నిరుద్యోగులకు నెలకు రూ. 3,016 భృతి అందిస్తామని కూడా టీఆర్ఎస్ హామీ ఇచ్చింది. కానీ ఈ హామీని సైతం కేసీఆర్ అమలు చేయలేదు. ఓవైపు ఉద్యోగ ప్రకటనలు లేక.. మరోవైపు ఉద్యోగాలు రాక.. ఇంట్లో వాళ్లకు భారమవుతూ.. యువత పడుతున్న వేదన వర్ణనాతీతంగా మారింది. కరోనాతో నిరుద్యోగుల బాధ మరింత తీవ్రమైంది. ఇలాంటి పరిస్థితుల్లోనూ సర్కారు నిరుద్యోగ భృతి ఊసెత్తడం లేదు. తెలంగాణ ఉద్యమంలో కీలక పాత్ర పోషించిన యువత ఇప్పుడు ఉద్యోగాల్లేక, నిరుద్యోగ భృతీ అందక తీవ్ర ఇబ్బందుల్లో ఉంది.

ఇచ్చిన హామీలన్ని నెరవేరుస్తామంటున్న ప్రభుత్వ పెద్దలు.. ఫించన్ల వయసు తగ్గింపు, నిరుద్యోగ భృతి అమలుపైనా దృష్టిసారించాలని వృద్ధులు, యువత కోరుకుంటున్నారు. ఇటీవలే ప్రకటించినట్లు ఉద్యోగాల భర్తీ ప్రక్రియను సాధ్యమైనంత త్వరగా చేపడితే యువత సంతోషిస్తుంది.