రెండో భార్యకు కరోనా.. భర్త మృతి

కరోనా భయంతో అనేకమంది ప్రాణాలు వదులుతున్నారు. కరోనా రాకముందే భయపడుతూ.. కొందరు తమలో ఏమాత్రం లక్షణాలు కల్పించినా ఆత్మహత్యలకు పాల్పడుతున్నారు. ఇంకొందరు తమ వారికి కరోనా సోకిందన్న భయంతో చనిపోతున్నారు. తాజాగా భార్యకు కరోనా సోకిందన్న ఆందోళనతో భర్త గుండెపోటుతో చనిపోయాడు. కరీంనగర్ జిల్లా కోరుట్లలో ఈ ఘటన జరిగింది. రాఘవపేటకు చెందిన బెజ్జారపు పరమానందం(55)కు ఇద్దరు భార్యలు. రెండో భార్యకు కరోనా పాజిటివ్‌ వచ్చింది. తన ఇల్లాలికి వైరస్‌ రావడంతో ఆయన తీవ్ర ఆందోళనకు గురయ్యాడు. ఈ క్రమంలో సోమవారం గుండెపోటుతో మృతిచెందాడు.

Read More: హైదరాబాద్‌లో దారుణం.. వీడియో కాల్ మాట్లాడుతూ గర్భిణికి సిజేరియన్

అయితే పరమానందం భార్యకు కరోనా రావడంతో అతడి అంత్యక్రియలు చేయడానికి బంధువులు, చుట్టుపక్కలవారు ఎవరూ ముందుకు రాలేదు. దీంతో ఆయన భార్య తల్లడిల్లింది. ఈ విషయం కాస్త గ్రామ సర్పంచ్‌ లావణ్య, ఉపసర్పంచ్‌ ఎండీ.అమీనొద్దీన్, తహసీల్దార్‌ రమేష్‌లు వరకు వెళ్లింది. దీంతో జరిగిన విషయాన్ని ఎమ్మెల్యే కల్వకుంట్ల విద్యాసాగర్‌రావు దృష్టికి తీసుకెళ్లారు. దీనిపై స్పందించిన ఆయన కోరుట్లకు చెందిన ఆల్‌ ఇండియా మానవత్వ సందేశ సమితి సభ్యులకు సమాచారం ఇచ్చారు.

దీంతో సంస్థ సభ్యులు నజీర్‌ అలీ, ఇసాక్‌ అబ్దుల్లా, సుష్యాల్, హఫీజ్, అబ్దుల్‌ రబ్‌లు ప్రత్యేక అంబులెన్స్‌లో రాఘవపేటకు చేరుకున్నారు. పీపీ కిట్లు ధరించి, పరమానందం మృతదేహాన్ని గ్రామ శివారులోని శ్మశానవాటికకు తీసుకెళ్లి, అంత్యక్రియలు నిర్వహించారు. మానవత్వాన్ని చాటుకున్న ఆ సమితి సభ్యులకు బాధిత కుటుంబ సభ్యులు, ఆ గ్రామ ప్రజాప్రతినిధులు, నాయకులు కృతజ్ఞతలు తెలిపారు. అయితే చనిపోయిన వ్యక్తికి కుమారుడు ఉన్నా కూడా కరోనా భయంతో అంత్యక్రియలు చేసేందుకు మాత్రం ముందుకు రాకపోవడం గమనార్హం.