హైద‌రాబాద్‌లో లాక్‌డౌన్ పెడితే..! వైన్ షాపుల కొత్త డిమాండ్

హైద‌రాబాద్‌లో లాక్‌డౌన్ విధిస్తార‌నే ప్రచారం నేపథ్యంలో వైన్ షాపులు కొత్త డిమాండ్‌తో ముందుకు వచ్చాయి. ఒక వేళ నగరంలో మ‌ళ్లీ లాక్ డౌన్ అమలు చేస్తే నిత్యవ‌స‌ర సరకుల దుకాణాలకు అనుమతించేలాగే మద్యం దుకాణాలకు కూడా ప‌ర్మిష‌న్ ఇవ్వాలని కోరుతున్నారు. ఈ మేరకు లిక్కర్ అండ్ బీర్ సప్లయర్స్ అసోసియేష‌న్, వైన్ షాప్స్ య‌జ‌మానులు ప్రభుత్వానికి డిమాండ్ చేశారు. నిత్యావసర వస్తువుల దుకాణాలకు రోజూ 3 గంటలు అనుమతి ఇస్తారనే ప్రచారం జరుగుతున్న వేళ.. వైన్స్ షాపులకు కూడా రోజూ అంతే సమయం అనుమతి ఇవ్వాల‌ని కోరారు.

అలా అనుమ‌తి ఇవ్వకపోతే తాము తీవ్రంగా నష్టపోతామని ఆందోళన వ్యక్తం చేశారు. కరోనాతో ఇప్పటికే తమకు అమ్మకాలు పడిపోయాయని తెలిపారు. బీర్ల అమ్మకాలు కూడా ఆశించినంతగా లేవని వివరించారు. గత లాక్ డౌన్‌లో సుమారు నెలన్నరకు పైగా వైన్ షాపులు మూసివేశామని గుర్తు చేశారు. అయినా, తమకు ఊరట కలిగించేందుకు ప్రభుత్వం లైసెన్స్ ఫీజును ఏమాత్రం త‌గ్గించ‌లేద‌ని వైన్ షాపుల యజమానులు ఆవేదన వ్యక్తం చేశారు. దీనిని దృష్టిలో ఉంచుకుని రోజుకు కనీసం మూడు గంటల పాటైనా అమ్మకాలకు అనుమతి ఇవ్వాలని కోరారు. ప్రభుత్వ నిబంధనలన్నీ పాటిస్తూ అమ్మకాలు సాగిస్తామని వెల్లడించారు.

Also Read: undefined

Also Read: undefined