కరోనా బాధితులకు టెస్టులు చేయకుండానే డిశ్చార్జి.. మంత్రి ఈటల ప్రకటన

తెలంగాణలో కరోనా వైరస్ వ్యాప్తి పూర్తిస్థాయిలో అదుపులో ఉంచేందుకు అన్ని చర్యలు తీసుకుంటున్నట్లు వైద్య ఆరోగ్య శాఖ మంత్రి ఈటల రాజేందర్ తెలిపారు. ఒకే కుటుంబంలో ఎక్కువ మందికి కరోనా వైరస్ సోకుతుండడం వల్లే రాష్ట్రంలో ఎక్కువ కేసులు నమోదవుతున్నాయని వెల్లడించారు. హైదరాబాద్‌‌లో యాక్టివ్ కరోనా కేసులు ఎక్కువగా ఉన్న ప్రాంతాల్లోని నోడల్ అధికారులు, డాక్టర్లతో మంత్రి ఈటల సమావేశం నిర్వహించారు.

కరోనా చికిత్స విషయంలో భారత వైద్య పరిశోధన మండలి (ఐసీఎంఆర్) తాజాగా పలు కీలక మార్పులతో మార్గదర్శకాలు విడుదల చేసిందని మంత్రి వివరించారు. వాటి ప్రకారం డిశ్చార్జ్ పాలసీ, హోమ్ ఐసోలేషన్, డెత్ గైడ్ లైన్స్‌ను రాష్ట్ర ప్రభుత్వం అమలు చేస్తుందని వివరించారు. ఐసీఎంఆర్ కొత్త మార్గదర్శకాల ప్రకారం కరోనా పాజిటివ్ ఉన్న వ్యక్తులను పది రోజుల పాటు చికిత్స అందించాక ఎలాంటి పరీక్షలు లేకుండానే డిశ్చార్జ్ చేసేయవచ్చని మంత్రి చెప్పారు. ఇలా డిశ్చార్జ్ అయిన వారిని మరో వారం రోజుల పాటు హోమ్ ఐసోలేషన్‌లో ఉంచాలని మంత్రి చెప్పారు. కరోనా లక్షణాలు ఎక్కువ ఉన్న లేదా ఇతర దీర్ఘకాలిక ఆరోగ్య సమస్యలు ఉన్నవారిని మాత్రం ఆస్పత్రిలోనే ఉంచి చికిత్స అందిచాలని ఐసీఎంఆర్ సూచించినట్లుగా మంత్రి చెప్పారు.

Also Read: undefined

ఇక మరణాల విషయంలోనూ ఐసీఎంఆర్ మార్గదర్శకాలు ఇలా ఉన్నాయి. క్యాన్సర్, గుండెజబ్బులు వంటి ఇతర సమస్యల వల్ల చనిపోయిన వారికి కరోనా పాజిటివ్ ఉంటే వారు దీర్ఘకాలిక వ్యాధులతో చనిపోయినట్టుగానే గుర్తించాలని నిర్దేశించింది. ఈ మరణాల కారణాలను విశ్లేషించడానికి ప్రొఫెసర్లతో కూడిన ఉన్నతస్థాయి కమిటీ అధ్యయనం చేస్తుంది. వారిచ్చిన డెత్ ఆడిట్ రిపోర్ట్ ప్రకారమే మరణాలను ప్రకటించాలని ఐసీఎంఆర్ వెల్లడించింది.

Also Read: undefined