వర్షంతో ట్రాఫిక్‌ జామ్.. 108 వాహనంలో మహిళ ప్రసవం

నిండు గర్భిణికి పురిటి నొప్పులు రావడంతో ఆస్పత్రి తరలిస్తుండగా 108 వాహనంలో ప్రసవించిన ఘటన హైదరాబాద్‌లోని మలక్‌పేట చౌరస్తా వద్ద చోటు చేసుకుంది. ట్రాఫిక్‌లో చిక్కుకుపోవడంతో చేసేదేంలేక 108 సిబ్బంది అంబులెన్స్‌లోనే ఆమెకు ప్రసవం చేశారు. ఆ మహిళ పండంటి మగబిడ్డకు జన్మనిచ్చింది. ఆ తర్వాత తల్లీబిడ్డలను కోఠి ప్రసూతి ఆస్పత్రికి తరలించారు.

మహబూబ్ నగర్ జిల్లాకు చెందిన రవి భార్య గౌరి (22) బడంగ్‌పేటలో నివాసం ఉంటోంది. తొమ్మిది నెలల నిండు గర్భిణి అయిన ఆమెకు గురువారం (అక్టోబర్ 3) సాయంత్రం పురిటి నొప్పులు ఎక్కువయ్యాయి. దీంతో కుటుంబ సభ్యులు ఓలా క్యాబ్‌లో ఆమెను తీసుకొని ఆస్పత్రికి బయలుదేరారు. మార్గమధ్యంలో సంతోష్ నగర్ చౌరస్తా వద్ద ఆమెను 108 వాహనంలోకి తరలించారు.

అంబులెన్స్ మలక్‌పేట చౌరస్తా చేరుకునేసరికి ట్రాఫిక్ ఎక్కడికక్కడ నిలిచిపోయింది. అప్పడే కురిసిన వర్షానికి రోడ్లన్నీ జలమయం కావడంతో ట్రాఫిక్ జామ్ ఏర్పడింది. ఈలోగా గౌరికి పురిటినొప్పులు తీవ్రమవడంతో అంబులెన్స్‌లోనే ప్రసవించింది.

108 అంబులెన్స్ సిబ్బంది శ్రీశైలం, పైలట్ సారథి వాహనాన్ని పక్కకు నిలిపి మహిళకు ప్రసవం చేశారు. అనంతరం తల్లీబిడ్డలను కోఠి ప్రసూతి ఆస్పత్రికి తరలించారు. తల్లీబిడ్డా ఇద్దరూ క్షేమంగా ఉన్నట్లు వైద్యులు తెలిపారు.