భర్తకు గుండెపోటు.. ముందే చనిపోవాలని ఉరేసుకున్న భార్య

హైదరాబాద్‌లోని యూసుఫ్‌గూడలో హృదయ విదారక ఘటన వెలుగు చూసింది. పచ్చని కాపురంలో ‘గుండెపోటు’ రూపంలో విధి చిచ్చు రేపింది. భర్తకు గుండెపోటు వచ్చిందని ఆందోళనకు గురైన ఓ ఇల్లాలు.. కట్టుకున్న వాడి కంటే ముందే మరణించాలని ఉరేసుకొని తనువు చాలించింది. రహమత్‌ నగర్‌లో చోటు చేసుకున్న ఈ ఘటన కలకలం రేపుతోంది. మహిళ తల్లి ఫిర్యాదు మేరకు జూబ్లీహిల్స్ పోలీసులు కేసు నమోదు చేసుకున్నారు.

పోలీసులు తెలిపిన వివరాల ప్రకారం.. నారాయణపేట జిల్లా కోస్గీ మండలం నారాయణపేటకు చెందిన సింధూజ (25) రహమత్‌ నగర్‌‌లో నివసించే శివకుమార్‌ను కొన్నేళ్ల కిందట వివాహం చేసుకుంది. ఈ దంపతులకు 13, 8 ఏళ్ల వయసున్న ఇద్దరు కుమారులు ఉన్నారు. శివకుమార్ నగరంలోని ఓ ప్రైవేట్ కంపెనీలో పనిచేస్తూ కుటుంబాన్ని పోషిస్తున్నాడు.

Also Read: హైకోర్టు తీర్పుతో ఆర్టీసీ జేఏసీ సంచలన నిర్ణయం

శివకుమార్‌కు నవంబర్ 12న గుండెపోటు వచ్చింది. అతడిని వెంటనే ఆస్పత్రికి తరలించి చికిత్స అందించారు. భర్త ఆరోగ్యం విషయంలో సింధూజ తీవ్ర ఆందోళనకు గురైంది. దీనికి తోడు శివకుమార్ తాను ఎక్కువ రోజులు బతకనేమో అని భార్య వద్ద బాధపడ్డాడు. దీంతో ఆ ఇల్లాలు మరింత ఆందోళనకు గురైంది. భర్త కంటే ముందే తాను చనిపోవాలని భావించింది.

భర్త ఆరోగ్యం విషయంలో ఆందోళనకు గురైన సింధూజ తన తల్లికి ఫోన్‌ చేసి ఆవేదన వ్యక్తం చేసింది. తన భర్త కంటే ముందు తానే చనిపోతానంటూ ఏడ్చింది. ఆమెకు ధైర్యం చెప్పిన తల్లి.. తాను వెంటనే బయల్దేరి వస్తానని, ఆందోళనకు గురి కావొద్దని భరోసా ఇచ్చింది. అయితే.. అనివార్య కారణాల వల్ల ఆమె అనుకున్న రోజు కుమార్తె వద్దకు బయల్దేరలేకపోయింది. ఈలోగా ఘోరం జరిగిపోయింది.

Also Read: ఇంట్లో ఎవరూ లేనిది చూసి విద్యార్థినిపై అత్యాచారయత్నం..

మానసికంగా కుంగిపోయిన సింధూజ గురువారం (నవంబర్ 14) తన ఇంట్లో ఫ్యానుకు చున్నీతో ఉరి వేసుకుంది. గమనించిన కుటుంబ సభ్యులు వెంటనే ఆమెను కిందకు దించి ఆసుపత్రికి తరలించారు. అక్కడ చికిత్స పొందుతూ సోమవారం వేకువజామున ప్రాణాలు విడిచింది.