హైదరాబాద్ జూలో ఏనుగులతో కేక్ కటింగ్.. స్పెషల్ ఏంటంటే..

ప్రపంచ ఏనుగుల దినోత్సవం సందర్భంగా హైదరాబాద్‌లోని నెహ్రూ జంతు ప్రదర్శనశాలలో వేడుకలు నిర్వహించారు. ఈ సందర్భంగా జూలోని ఏనుగులకు ప్రత్యేక ఆహారం అందించారు. వాటి కోసం ప్రత్యేకంగా కేకులు తయారు చేశారు. ఆ కేకులపై ఏనుగుల పేర్లు కూడా రాయడం విశేషం. రాగిపిండి, బియ్యంపిండితో చేసిన ఈ కేకులతో పాటు ఏనుగులకు చెరకు, బెల్లం, పైనాపిల్, కొబ్బరి, పచ్చిగడ్డి, మొక్కజొన్న వంటి పదార్థాలను ఆహారంగా అందించారు. ఈ మేరకు నెహ్రూ జూ అధికారులు బుధవారం ఓ ప్రకటన విడుదల చేశారు.

ప్రస్తుతం హైదరాబాద్ జూలో 5 ఏనుగులు ఉన్నాయి. వీటిలో ఒకటి మగ ఏనుగు కాగా, మిగతావి ఆడ ఏనుగులు. ఈ 5 ఏనుగుల్లో వయసు పైబడిన రాణి (82) అనే పేరుగల ఏనుగు కూడా ఉంది. వీటన్నింటి ఆరోగ్యం ప్రస్తుతం బాగానే ఉన్నట్లు అధికారులు తెలిపారు. ఇంఛార్జిలు, అధికారుల సమక్షంలో ఏనుగులకు రోజూ సరైన ఆహారం అందిస్తున్నట్లు వివరించారు.

కొద్ది రోజుల క్రితం ఈ జూ పార్క్‌లో ఉన్న ఓ చింపాంజీకి అధికారులు పుట్టిన రోజు వేడుకలు నిర్వహించిన సంగతి తెలిసిందే. హైదరాబాద్ జూ పార్క్‌కు సూజీ అనే చింపాంజీ ప్రత్యేక ఆకర్షణ. సుజీ 33 సంవ‌త్సరాలు పూర్తి చేసుకొని 34వ ఏట అడుగు పెట్టింది. 2011 సంవత్సరంలో సహారా గ్రూప్ సంస్థ జూ పార్కుకు సుజీని బహుమతిగా ఇచ్చింది.