ఒంటిమీద పెట్రోల్ పోసుకున్నవారికి అగ్గిపెట్టే దొరకలేదా..?: షర్మిల

YS Sharmila: తెలంగాణ రాష్ట్రంలో ఉద్యమకారులకు అన్యాయం జరుగుతోందని.. వైఎస్సార్ తెలంగాణ పార్టీ చీఫ్ షర్మిల ఆరోపించారు. తెలంగాణ ఉద్యమకారులను పట్టించుకోవడం లేదని విమర్శించారు. నాగరాజు అనే ఉద్యమకారుడు రెండు కాళ్లు, చేయి పోగొట్టుకున్నాడని.. ఇప్పటివరకు నాగరాజుకు న్యాయం జరగలేదని షర్మిల ఆవేదన వ్యక్తం చేశారు. ఉద్యమకారులు చనిపోతేనే తెలంగాణ (Telangana) వచ్చింది కదా అని వ్యాఖ్యానించారు. కేసీఅర్ (CM KCR) ఉద్యమంలో జైలుకు వెళ్లారా.. లాఠీ దెబ్బలు తిన్నారా అని వైఎస్ షర్మిల ప్రశ్నించారు. కేసీఅర్ కుటుంబంలో ఎవరైనా ఆత్మహత్య చేసుకున్నారా అని ప్రశ్నించారు. ఒంటిమీద పెట్రోల్ పోసుకొని అగ్గి పెట్టె దొరకనట్లు నాటకం ఆడారని సెటైర్లు వేశారు. ప్రాణ త్యాగాలు ఒకరివి.. భోగాలు ఒకరీవని విమర్శలు గుప్పించారు. 12 వందల మంది చనిపోతే.. వారిలో సగం మందివి బలిదానాలు కావంటున్నారని ఫైర్ అయ్యారు.

ఉద్యమకారుడు అని పాలన చేతిలో పెడితే.. మొత్తం దోచుకున్నారని వైఎస్ షర్మిల (YS Sharmila) ఆరోపించారు. కేసీఅర్ కుటుంబానికి తెలంగాణ బంగారం అయ్యిందన్నారు. ఉద్యమకారుల కోసం కాంగ్రెస్, బీజేపీలు అండగా నిలబడలేదని షర్మిల కామెంట్ చేశారు. కాంగ్రెస్ పార్టీలో గెలవడం.. టీఆర్ఎస్ పార్టీకి అమ్ముడుపోవడమని ఎద్దేవా చేశారు. కేసీఆర్ పార్టీకి మళ్లీ ఓటేస్తే ఇక అంతే సంగతులు అని వ్యాఖ్యానించారు. రాజన్న రాజ్యం రావాలంటే.. వైఎస్సార్ తెలంగాణ పార్టీకి ఓటు వేయాలని విజ్ఞప్తి చేశారు.