కేసీఆర్‌కి ఫస్ట్ దెబ్బ పడింది.. రాములమ్మ ఘాటు వ్యాఖ్యలు

తెలంగాణ ముఖ్యమంత్రి కేసీఆర్‌పై విరుచుకుపడ్డారు మాజీ చెల్లెమ్మ, బీజేపీ జాతీయ కార్యవర్గ సభ్యురాలు విజయశాంతి. నిజామాబాద్ జిల్లా ఎడపల్లిలో నిర్వహించిన రైతు సదస్సులో ఆమె ఆవేశంగా మాట్లాడారు. రాష్ట్ర ప్రభుత్వమే ధాన్యం కొనుగోలు చేయాలని ఆమె డిమాండ్ చేశారు. బీజేపీ రాష్ట్రంలో పాగా వేయబోతోందని సీఎం కేసీఆర్‌కి భయం పట్టుకుందని ఎద్దేవా చేశారు. గతంలో లేని ధాన్యం కొనుగోళ్ల సమస్య ఇప్పుడే ఎందుకొచ్చిందని ఆమె ప్రశ్నించారు. తన లక్షల కోట్ల అవినీతి బయటపడుతుందని భయం పట్టుకుందన్నారు.

హుజూరాబాద్ ఎన్నికలతోనే కేసీఆర్‌కి ఫస్ట్ దెబ్బ పడిందని విజయశాంతి అన్నారు. దళిత బంధు ఇస్తాం.. ఇంటికి పది లక్షలు ఇస్తామన్నా హుజూరాబాద్ ఫ్రజలు బీజేపీకి ఓటేసి భారీ మెజార్టీతో గెలిపించారని చెప్పారు. ఓటుతో కేసీఆర్ చెంప చెల్లుమనిపించారని ఘాటు వ్యాఖ్యలు చేశారు. బీజేపీ అధిష్టానం రాష్ట్రం వైపు చూస్తోందని కేసీఆర్ భయపడుతున్నారని.. ప్రాజెక్టుల పేరుతో చేసిన లక్షల కోట్ల అవినీతి బయటపడుతుందేమోనని ఆందోళన చెందుతున్నారని ఆమె అన్నారు. రైతులతో పెట్టుకున్న ఏ ప్రభుత్వం ఎక్కువకాలం మనలేదన్నారు.

ఇప్పటికే ధాన్యం కొనుగోళ్ల వ్యవహారంలో బీజేపీ, టీఆర్ఎస్ మధ్య పచ్చగడ్డి వేస్తే భగ్గుమంటోంది. పంజాబ్ తరహాలో తెలంగాణలోనూ మొత్తం ధాన్యం కొనుగోలు చేయాలని కేసీఆర్ సర్కార్ వాదిస్తోంది. నిబంధనలకు విరుద్ధంగా ధాన్యం సేకరించలేమని కేంద్రం తేల్చిచెప్పేయడంతో వివాదం మరింత ముదిరింది. ధాన్యం కొనుగోలు చేయాల్సిందేనంటూ టీఆర్ఎస్ నిరసనల బాట పడితే.. బీజేపీ మాత్రం రాష్ట్రమే కొనుగోలు చేయాలని డిమాండ్ చేస్తోంది. ధనిక రాష్ట్రమని చెబుతున్న సీఎం ధాన్యం కొనుగోలు చేయలేరా? అని ప్రశ్నిస్తోంది.

Also Read: