నిజామాబాద్ జిల్లా పర్యటనకు కేసీఆర్.. ఏం మాట్లాడతారన్న దానిపై సర్వత్రా ఆసక్తి

CM KCR: ముఖ్య‌మంత్రి కేసీఆర్ సోమవారం నిజామాబాద్ జిల్లాలో ప‌ర్య‌టించ‌నున్నారు. తొలుత జిల్లా పార్టీ కార్యాలయాన్ని గులాబీ బాస్ ప్రారంభిస్తారు. అనంతరం సమీకృత కలెక్టరేట్ కార్యాలయాన్ని ప్రారంభిస్తారు. ఆ తర్వాత జరిగే బహిరంగ సభలో ముఖ్యమంత్రి కేసీఆర్ మాట్లాడనున్నారు. సీఎం కేసీఆర్ స‌భ ఏర్పాట్ల‌ను మంత్రి ప్ర‌శాంత్ రెడ్డి (Prashanth Reddy) ప‌రిశీలించారు. జీజీ కాలేజ్ గ్రౌండ్ తోపాటు.. నూత‌న క‌లెక్ట‌రేట్ ను ప్ర‌శాంత్ రెడ్డి ప‌రిశీలించారు. ఈసంద‌ర్భంగా మంత్రి ప్రశాంత రెడ్డి మాట్లాడుతూ.. కేసీఆర్ జాతీయ రాజకీయాలపై కీలక వ్యాఖ్యలు చేసే అవకాశం ఉందన్నారు. ఐటీ, ఈడీ (Enforcement Directorate) దాడులపై ముఖ్యమంత్రి కేసీఆర్ ప్రజలకు వివరించే అవకాశముందని స్పష్టం చేశారు. ఇటీవల పెద్దపల్లి (Peddapalli) జిల్లా పెద్దకల్వలలో నిర్మించిన సమీకృత ప్రభుత్వ కార్యాలయాల సముదాయాన్ని కేసీఆర్ ప్రారంభించారు. గతంలోనూ పలుచోట్ల ప్రారంభోత్సాలు జరిగాయి. కేసీఆర్ వెళ్లిన ప్రతీచోట సభలు నిర్వహించారు. ఆయా సభలో కేసీఆర్ కేంద్రంపై తీవ్ర ఆరోపణలు చేశారు. ముఖ్యంగా బీజేపీ పార్టీని టార్గెట్ చేస్తూ.. విమర్శలు గుప్పించారు. విద్యుత్, ఈడీ, సీబీఐ వంటి సంస్థలపైనా కేసీఆర్ (CM KCR) తనదైన శైలిలో పంచ్ లు వేశారు. ఈ నేపథ్యంలో.. సోమవారం జరిగే సభలో కేసీఆర్ ఏం మాట్లాడబోతున్నారన్న దానిపై ప్రజల్లో ఆసక్తి నెలకొంది.