జులాయి సినిమా తరహాలో తెలంగాణ గ్రామీణ బ్యాంక్‌లో భారీ చోరీ

నిజామాబాద్‌ జిల్లా (Nizamabad) మెండోరా మండలం బుస్సాపూర్‌లోని తెలంగాణ గ్రామీణ బ్యాంకు (Telangana Grameena Bank) శాఖలో సినీ ఫక్కీలో భారీ చోరీ జరిగింది. జులాయి సినిమా తరహాలో దొంగలు అర్ధరాత్రి దాటిన తర్వాత గ్యాస్ కట్టర్‌తో షట్టర్ కట్ చేసి బ్యాంక్‌లో చొరబడ్డారు. నిందితులందరూ మంకీ మాస్క్‌లు ధరించి సొత్తు దోచుకెళ్లారు. రూ.7.30 లక్షల నగదుతో పాటు రూ.3 కోట్ల విలువైన బంగారు ఆభరణాలను ఎత్తుకెళ్లారు. బ్యాంకులోని లాకర్లను కూడా గ్యాస్ కట్టర్‌తో కట్ చేసి తెరిచారు. ఈ క్రమంలో అగ్నిప్రమాదం చోటు చేసుకొని కొంత నగదు కాలి బూడిదైంది. కీలక ఫైల్స్ కూడా దగ్ధమయ్యాయి.

తెలంగాణ గ్రామీణ బ్యాంకు శాఖ పక్కనే ఉన్న బీఎస్‌ఎన్ఎల్‌ కార్యాలయం నుంచి దొంగలు బ్యాంకులోకి ప్రవేశించినట్లు పోలీసులు గుర్తించారు. దొంగలు తెలివిగా తొలుత బ్యాంకులోని అలారం సెన్సార్‌ను ధ్వంసం చేసి చోరీకి పాల్పడ్డారు. ఈ ఘటన శనివారం అర్ధరాత్రి జరగ్గా, ఆదివారం బ్యాంకుకు సెలవు కావడంతో ఆలస్యంగా వెలుగులోకి వచ్చింది. చోరీకి గురైన బంగారు ఆభరణాలు రైతులు రుణాల కోసం తాకట్టు పెట్టినవిగా బ్యాంక్‌ అధికారులు తెలిపారు.

ఈ కేసును పోలీసులు సీరియస్‌గా తీసుకున్నారు. ఆర్మూర్ ఏసీపీ పర్యవేక్షణలో ప్రత్యేక దర్యాప్తు బృందం ఈ కేసును విచారిస్తోంది. తెలుగు రాష్ట్రాల్లో ఈ స్థాయిలో బ్యాంక్‌లో దొంగతనం జరగడం ఇటీవల కాలంలో ఇదే తొలిసారి. అంతర్రాష్ట్ర దొంగల ముఠా పని అయుంటుందని పోలీసులు భావిస్తున్నారు. దొంగతనం చేసిన అనంతరం సీసీ కెమెరాకు సంబంధించిన డీవీఆర్‌ను సైతం దొంగలు ఎత్తుకెళ్లిపోయారు.

ఘటనా స్థలం నుంచి పోలీసులు, క్లూస్‌ టీం ఆధారాలు సేకరించారు. దొంగలు ఉపయోగించిన మాస్క్‌లను స్వాధీనం చేసుకున్నారు. అధికారులను అడిగి వివరాలు తెలుసుకున్నారు. చోరీ జరిగిన బ్యాంక్ ఉన్న మార్గంలోని సీసీటీవీ ఫుటేజీలను పరిశీలించి నిందితులను గుర్తించే ప్రయత్నం చేస్తున్నారు.

Also Read:

✦ అగ్నిపథ్ స్కీమ్‌‌పై సుప్రీంకోర్టు కీలక నిర్ణయం

✦ అది ఎత్తుగడే.. రేవంత్‌ రెడ్డితో వివాదంపై జగ్గారెడ్డి సంచలనం!