Kamareddy: శివాలయంలో అద్భుతం.. శివలింగానికి నాగుపాము ప్రదక్షిణలు !

Kamareddy: హిందూ సంప్రదాయంలో ప్రకృతినే దైవంగా భావించి పూజలు చేస్తారు. పశుపక్షాదులతో పాటు పామలు, జంతువులను భక్తి శ్రద్ధలతో పూజిస్తారు. ఇక సర్పాలకు హిందూ ధర్మంలో ప్రత్యేక స్థానం ఉంది. శివడి మెడులో కంఠాభరణం, శ్రీమహా విష్ణువు పాన్పుగా ఆదిశేషుడు ఉంటాడు. పురణాల్లోనూ పాముల గురించి రకరకాల కథలను ప్రస్తావించారు. ఇటీవల కాలంలో తరచుగా ఆలయాల్లో నాగుపాములు ప్రత్యక్షం కావటం మనం వింటూనే ఉన్నాం. తాజాగా తెలంగాణలోని కామారెడ్డి జిల్లాలో ఓ భారీ నాగు పాము ఆలయంలో ప్రత్యక్షమైంది. వివరాల్లోకి వెళితే.. కామారెడ్డి జిల్లా దోమకొండ శివారులోని సుబ్రహ్మణ్య స్వామి ఆలయం ఉంది. ఇక్కడ సుబ్రహ్మణ్య స్వామితో పాటు అనేక ఉపాలయాలు ఉన్నాయి. ఆలయంలో శివుడు కూడా భక్తులచే ప్రత్యేక పూజలు అందుకుంటాడు. ఇదిలా ఉండగా.. ఇవాళ ఉదయం శివాలయంలోని గర్భాలయంలో ఓ నాగుపాము ప్రత్యక్షం అయింది. శివ లింగాన్ని చుట్టుకుని చాలా సేపు అలాగే ఉండిపోయింది. అనంతరం లింగం చుట్టూ సుమారు గంట పాటు నాగు పాము ప్రదక్షిణలు చేసింది.

దీంతో ఈ వింతను చూడడానికి భక్తులు ఆలయం వద్దకు పెద్ద ఎత్తున చేరుకున్నారు. ఆలయం ముందు ప్రత్యేక పూజలు నిర్వహించారు. శివనామ స్మరణంతో ఆలయ ప్రాంగణం మెుత్తం మార్మోగిపోయింది. కాసేపటికి పాము ఆలయంలోని ఓ మూలకు చేరుకోగా.. స్నేక్ క్యాచర్స్‌ వచ్చి పాముని ఒక ప్లాస్టిక్ డబ్బాలో బంధించారు. అనంతరం నాగుపామును దట్టమైన అటవీ ప్రాంతంలో సురక్షితంగా వదిలివేశారు.

Read More Telangana News And Telugu News