ఈటల ఎపిసోడ్: ‘ఫాంహౌజ్ నుంచి ఫోనొచ్చిందా..?’ 2 గంటల్లోనే అచ్చంపేట్ TRS సర్పంచ్ యూటర్న్

మంత్రి ఈటల రాజేందర్‌పై వచ్చిన భూకబ్జా ఆరోపణలపై అచ్చంపేట గ్రామ సర్పంచ్ ఒకే రోజు రెండు రకాలుగా మాట మార్చారు. ఉదయం ఈటల రాజేందర్‌పై వచ్చిన భూకబ్జా ఆరోపణలన్నీ అవాస్తవమని చెప్పిన అచ్చంపేట గ్రామ టీఆర్ఎస్‌కు చెందిన సర్పంచ్ లక్ష్మీ మధ్యాహ్నానికే ప్లేటు ఫిరాయించారు. మంత్రి ఈటలపై రైతులు కావాలనే ఆరోపణలు చేస్తున్నారని శనివారం పొద్దున మీడియాతో సర్పంచ్ లక్ష్మీ మాట్లాడారు. ఆ ఆరోపణలు అబద్ధమని కొట్టిపారేశారు. మధ్యాహ్నానికి మాటమార్చి మరో వీడియో విడుదల చేశారు. మంత్రి ఈటల తమ 3 ఎకరాల భూమి లాక్కున్నారంటూ ఆరోపించారు.

‘‘మా భూమి మూడు ఎకరాలు ఈటల రాజేందర్ గుంజేసుకున్నడు. అందరిది కూడా అట్లనే గుంజేసుకున్నడేమో. మాకైతే ఇప్పుడు కేసీఆర్ న్యాయం చేయాలి. మా పొలాల చుట్టూ కడీలు పాతిండు. అన్నీ దొబ్బేసిండు. పోలీసులను తీసుకొచ్చి బెదిరిస్తే మేం భయపడ్డం. అందుకే మళ్లీ అటువైపు పోలేదు. వాళ్ల దగ్గర గుండాలు ఉన్నరు. ఆ గుండాలకు భయపడి మేం అసలే అటువైపు పోలేదు. కేసీఆర్ ఏదో ఒకటి నువ్వే చేయాలి’’ అని సర్పంచ్ లక్ష్మీ ఓ వీడియోను విడుదల చేశారు.

ఉదయం ఇలా..
అంతకుముందు ఉదయం అచ్చంపేట సర్పంచ్ లక్ష్మి మాట్లాడుతూ.. ఈటలపై వచ్చిన ఆరోపణలన్నీ అవాస్తవమని అన్నారు. ఈ ఊరి గ్రామస్తులే గతంలో ఎకరానికి రూ.2 లక్షల చొప్పున ఈటల రాజేందర్‌కి అమ్ముకున్నారని అన్నారు. ఇప్పుడు భూమి విలువ పెరగడంతో డబ్బులకు ఆశపడి వారంతా ఇలా ఆరోపణలు చేస్తున్నారని మండిపడ్డారు. అప్పుడు అమ్ముకున్న రైతులే కావాలని ఇప్పుడు తిరగబడుతున్నారని ఆమె అన్నారు. వారి వెనకాల ఎవరో ఉండి చేయిస్తున్నట్లు ఆమె ఆరోపించారు. భూమి అమ్ముకున్న డబ్బులతో పిల్లల పెళ్లిళ్లు చేసుకున్నారని.. ఇళ్లు కట్టుకున్నారని.. అప్పులు తీర్చుకున్నారని సర్పంచ్ అన్నారు.

అయితే, అచ్చంపేట సర్పంచ్ కొద్ది కాలంలోనే ఇలా మాట మార్చడంపై ఆసక్తి నెలకొంది. ఆ కొన్ని గంటల్లో ఏం జరిగిందా అని ఆశ్చర్యపోతున్నారు. పై నుంచి ఒత్తిళ్ల వల్ల ఆమె ఇలా మాట్లాడి ఉంటుందని భావిస్తున్నారు. మరికొందరు మాత్రం ఫాంహౌజ్ నుంచి ఫోన్ రావడం వల్లే ఇలా ప్రవర్తించిందని చర్చించుకుంటున్నారు.