Harish Rao: మెదక్‌‌ను మెడికల్ హబ్‌గా తీర్చిదిద్దుతాం: హరీశ్ రావు

Harish Rao: తెలంగాణ ప్రభుత్వం వైద్యానికి అధిక ప్రాధాన్యత ఇస్తోందని.. మంత్రి హరీశ్ రావు వ్యాఖ్యానించారు. త్వరలోనే మెదక్‌లో మెడికల్ కాలేజీ, 400 పడకల హాస్పిటల్‌ను ఏర్పాటు చేస్తామని వెల్లడించారు. మెదక్‌ను మెడికల్ హబ్‌గా తీర్చిదిద్దుతామని స్పష్టం చేశారు. ప్రభుత్వం తరఫున వైద్యం అందించే విషయంలో.. ముఖ్యమంత్రి కేసీఆర్ (CM KCR) సీరియస్‌గా ఉంటారని చెప్పారు. దేశంలోని ఇతర రాష్ట్రాలకంటే ఎక్కువ పథకాలు.. తెలంగాణ రాష్ట్రంలోనే అమలవుతున్నాయని హరీశ్ రావు వివరించారు.

మెదక్‌కు ర్యాక్ పాయింట్ రావడంతో ఎరువుల కొరత లేదని మంత్రి హరీశ్ రావు స్పష్టం చేశారు. గతంలో లక్ష మెట్రిక్ టన్నుల ధాన్యం సేకరిస్తే.. ఇప్పుడు 5 లక్షల మెట్రిక్ టన్నుల ధాన్యాన్ని పండిస్తున్నామని వివరించారు. మెదక్ (Medak) ధాన్యగార జిల్లాగా మారిందన్నారు. సీఎం కేసీఆర్‌కు ఉన్న సంకల్పంతో రైతుల కోసం ఎన్నో పథకాలు ప్రవేశపెడుతున్నారని చెప్పారు. తెలంగాణలో 1.35 కోట్ల ఎకరాల్లో పంటలు పండుతున్నాయని వివరించారు. దేశంలోనే ఎక్కువ పంటలు పండుతున్న ఏకైక రాష్ట్రం.. తెలంగాణ అని అన్నారు.

కేంద్ర ప్రభుత్వం ధాన్యం కొనం అని చెప్పినా.. తెలంగాణ (Telangana) ప్రభుత్వం ధాన్యాన్ని చివరి గింజ వరకు కొనుగోలు చేసిందని హరీశ్ రావు వ్యాఖ్యానించారు. వాస్తవాలను ప్రజలముందు ఉంచాల్సిన బాధ్యత ప్రజా ప్రతినిధులపై ఉందన్నారు. విత్తన సాగు పెంచేలా రైతులను ప్రోత్సహించాలని.. పామాయిల్ తోటల పెంపకాన్ని ప్రోత్సహిస్తే రైతుకు డబుల్ ఆదాయం వస్తందని మంత్రి సూచించారు. ఆసరా (Asara) పెన్షన్లకు అర్హులైన వారు మిస్సయితే గుర్తించాలని.. సీఎం కేసీఆర్‌ను ఒప్పించి ఇప్పించే బాధ్యత నాది అని భరోసా ఇచ్చారు.