బ్రిడ్జి కింద వరదనీటిలో నిలిచిపోయిన బస్సు.. రాత్రంతా బిక్కుబిక్కుమంటూ!

పెళ్లి బృందంతో వస్తున్న ఓ బస్సు బ్రిడ్జి కింద వరద నీటిలో చిక్కుకోవడం వికారాబాద్ జిల్లాలో అలజడి రేపింది. వికారాబాద్‌ జిల్లా మోమిన్‌పేట మండలం కేసారం వద్ద ఈ ఘటన చోటు చేసుకుంది. హైదరాబాద్‌లోని బోరబండకు చెందిన ఓ యువకుడి పెళ్లి వేడుక కోసం బంధుమిత్రులంతా కలిసి బస్సులో వికారాబాద్ వెళ్లారు. కోటపల్లి మండలం బర్వాద్ గ్రామంలో పెళ్లి వేడుకను ముగించుకుని తిరిగి వస్తుండగా.. అప్పటికే భారీ వర్షం మొదలైంది. కేసారం రైల్వే అండర్‌ బ్రిడ్జి కింద నీరు చేరింది. అది గమనించని బస్సు డ్రైవర్ కింది నుంచి తీసుకెళ్లడంతో ఇంజిన్‌లోకి నీరు చేరి బస్సు నిలిచిపోయింది. అదివారం (జూన్ 20) రాత్రి 11 గంటల సమయంలో ఈ ఘటన చోటు చేసుకుంది.

వంతెన కింద వరద ప్రవాహం అంతకంతకూ పెరగడంతో బస్సులో ఉన్నవారంతా ఆందోళనకు గురయ్యారు. రాత్రంతా బస్సులోనే బిక్కుబిక్కుమంటూ గడిపారు. ఉదయం వారిని గమనించిన స్థానికులు తాళ్లు, నిచ్చెన సాయంతో సురక్షితంగా బయటకు తీసుకొచ్చారు. ఈ ఘటనలో ఎలాంటి ప్రాణనష్టం జరగకపోవడంతో అందరూ ఊపిరి పీల్చుకున్నారు. అనంతరం రైల్వే సిబ్బంది విద్యుత్‌ మోటార్ల సాయంతో వరద నీటిని బయటకి తోడేసి బస్సును బయటకు తీసే ప్రయత్నం చేశారు.

Also Read:

సికింద్రాబాద్ అల్లర్లు: పెద్ద ప్రమాదమే తప్పింది.. పవర్ కార్‌కు నిప్పు అంటుకొనుంటే!