దిగొచ్చిన ఎమ్మెల్సీ.. పోలీసులకు పట్నం క్షమాపణలు.!

మాజీ మంత్రి, టీఆర్ఎస్ ఎమ్మెల్సీ పట్నం మహేందర్ రెడ్డి ఎట్టకేలకు వెనక్కు తగ్గారు. తాండూరు సీఐని బూతులు తిట్టిన ఆడియో బయటకు లీక్ కావడం పెనుదుమారం రేపింది. ఎమ్మెల్యే వర్గీయులతో నెలకొన్న విభేదాల నేపథ్యంలో సీఐని టార్గెట్ చేస్తూ ఆయన బూతులతో విరుచుకుపడ్డారు. నీ అంతు చూస్తానంటూ రెచ్చిపోయారు. ఈ వ్యవహారం చినికిచినికి గాలివానగా మారడంతో ఎమ్మెల్సీ దిగొచ్చినట్లు తెలుస్తోంది. పొరపాటున నోరుజారానని.. పోలీసుల మనసులు నొచ్చుకున్నందుకు విచారిస్తున్నాననంటూ ప్రకటన విడుదల చేశారు.

పోలీసుల మనసు నొప్పించిన సంఘటన తనకూ బాధ కలిగించిందని ఎమ్మెల్సీ పట్నం పేర్కొన్నారు. పోలీసు సోదరులంతా తన కుటుంబ సభ్యులతో సమానమని.. తెలంగాణ రాష్ట్ర ఆవిర్భావానికి, అభివృద్ధి, శాంతి భద్రతల పరిరక్షణలో పోలీసుల కృషి భినందనీయమంటూ ప్రశంసలు కురిపించారు. ఆవేశంలో పొరపాటున నోరుజారానని ఆయన చెప్పుకొచ్చారు. అందుకు కొంతమంది మిత్రులు, పోలీసులు బాధపడితే అందుకు తీవ్రంగా విచారం వ్యక్తం చేస్తున్నానని మహేందర్ రెడ్డి తెలిపారు. పోలీసులంటే తనకు ఎనలేని గౌరవమని పేర్కొన్నారు.

Also Read: