Mahabubabad: రామాలయంలో మైక్ సెట్ చేస్తుండగా.. విద్యుదాఘాతంతో ముగ్గురు మృతి

మహబూబాబాద్‌ జిల్లాలో విషాదం చోటు చేసుకుంది. దేవుడి గుడిలో మైక్ సెట్ చేస్తుండగా దురదృష్టవశాత్తు కరెంట్ షాక్ తగిలి ముగ్గురు ప్రాణాలు కోల్పోయారు. దీనిపై పోలీసులు కేసు నమోదు చేసి దర్యాప్తు చేస్తు్న్నారు. వివరాల్లోకి వెళ్తే.. డోర్నకల్‌ మండలం అందనాలపాడులో మంగళవారం ఉదయం రామాలయానికి మైక్ సెట్ చేస్తుండగా విద్యుత్ షాక్‌తో ముగ్గురు దుర్మరణం చెందారు. మృతులను సుబ్బారావు, మస్తాన్‌రావు, వెంకయ్యలుగా గుర్తించారు.

ఈ ఘటన స్థానికంగా తీవ్ర విషాదం నింపింది. విషయం తెలిసి మృతుల కుటుంబ సభ్యులు అక్కడికి చేరుకొని కన్నీరు మున్నీరుగా విలపిస్తున్నారు. మైకులు కడుతున్న పైపు ఇనుపది కావడం వలనే విద్యుత్ షాక్ జరిగిందని స్థానికులు తెలిపారు. దీనికి సంబంధించి సమాచారం అందుకున్న పోలీసులు ఘటనా స్థలానికి చేరుకొని వివరాలు సేకరించారు. కేసు నమోదు చేసి దర్యాప్తు చేపట్టారు. కాగా, ఈ ఘటనకు సంబంధించిన మరింత సమాచారం తెలియాల్సి ఉంది.