పత్తి తీసేందుకు కూలీలను తీసుకెళ్తున్న ఆటో.. వెనక నుంచి ఢీ కొట్టిన ట్రాక్టర్

జనగామ జిల్లాలో ఘోర రోడ్డు ప్రమాదం చోటు చేసుకుంది. ఆటోను వెనక నుంచి బలంగా ఓ ట్రాక్టర్ ఢీ కొట్టింది. ఈ ఘటనలో ఓ కూలీ మృతి చెందగా.. మరికొందరికి గాయాలయ్యాయి. జనగామ జిల్లాలోని స్టేషన్ ఘన్‌పూర్ మండలం పామునూరు శివారులో సోమవారం మధ్యాహ్నం ఈ ప్రమాదం జరిగింది.స్టేషన్ ఘన్‌పూర్ నుంచి జఫర్‌గఢ్‌ మండలం కునూరుకు పత్తి తీసేందుకు 9 మంది మహిళా కూలీలు ఆటోలో బయల్దేరారు. ఈ క్రమంలోనే ఒక ట్రాక్టర్ అతి వేగంగా ఆటోను వెనక నుంచి ఢీ కొట్టింది. దీంతో ఆటో రోడ్డు పక్కనే ఉన్న చెట్టును ఢీకొంది. ఈ ప్రమాదంలో మోడెం కల్పన (35) తీవ్రంగా గాయపడింది. వెంటనే ఆమెను స్టేషన్ ఘన్‌పూర్‌లోని ఓ హాస్పిటల్‌కు తరలించారు. అక్కడ సరైన వైద్యం అందకపోవడంతో ఆమె మృతి చెందింది. మరోవైపు గాయపడిన ఆటో డ్రైవర్, పలువురు కూలీలకు అక్కడే స్థానికులు ప్రథమ చికిత్స అందించారు. అనంతరం 108 అంబులెన్స్ ద్వారా ఎంజీఎం ఆస్పత్రికి తరలించారు.