వెల్‌కమ్ బంగారం.. ఆడపిల్లకు జన్మనిచ్చిన కోడలికి అపురూప స్వాగతం

ఆడపిల్ల పుడితే కొంత మంది భారంగా భావిస్తున్న వేళ.. తెలంగాణలోని మహబూబాబాద్‌కు (Mahabubabad) చెందిన ఓ కుటుంబం ఆడపిల్లకు (Girl Child) జన్మనిచ్చిన కోడలికి ఘనంగా స్వాగతం పలికింది. వెల్‌కమ్ బంగారం అంటూ చిన్నారిపై, ఆమెకు జన్మనిచ్చిన తల్లిపై పూలవర్షం కురిపించింది. ఆడపిల్లకు జన్మనిచ్చిందని భార్యను ఇంట్లో నుంచి గెంటేస్తున్న భర్తలను, అత్తింటి వారిని ముక్కున వేలేసుకునేలా చేసిన ఈ ఘటన మహబూబూబాద్ జిల్లా అయ్యగారిపల్లిలో చోటు చేసుకుంది.

అయ్యగారిపల్లికి చెందిన ప్రవీణ్, కల్పన దంపతులు. కల్పనకు తొలి కాన్పులోనే ఆడపిల్ల జన్మించింది. దీంతో ఆ ఇంట్లో సంబరాలు అంబరాన్నంటాయి. ప్రసవం అనంతరం ఆసుపత్రి నుంచి డిశ్చార్జ్ అయిన కల్పనను భర్త కారులో ఇంటికి తీసుకురాగా.. తల్లీబిడ్డలకు పూల బాటతో వారి కుటుంబం స్వాగతం పలికింది. ఆ మహాలక్ష్మిని ఇంట్లోకి ఆహ్వానించి పూల పాన్పుపై పడుకోబెట్టింది. ఆ చిట్టితల్లి పాదాల ముద్రలను చిరకాలం గుర్తుండేలా తెల్లకాగితంపై వేసుకున్నారు.

ఆడపిల్లే మా ఇంటి మహాలక్ష్మి అంటూ తల్లితో పాటు బిడ్డను పూల బాటతో ఇంటి లోపలికి ఘనంగా స్వాగతం పలికింది ఈ కుటుంబంపై ప్రశంసల వర్షం కురుస్తోంది. ఆడపిల్లను ఆరాధిస్తున్న ఈ కుటుంబాన్ని ఆ దేవుడు చల్లగా చూడాలని స్థానికులు కోరుకున్నారు.

Also Read:

✦ ఇష్టంలేని పెళ్లి చేస్తున్నారు.. తల్లిదండ్రులపై ఫిర్యాదు చేసిన యువతి

✦ IIT Madras విద్యార్థికి రూ.2 కోట్ల ప్యాకేజీతో ఉద్యోగం.. రికార్డు స్థాయి వేతనం