బయటపడ్డ నిత్య పెళ్లి కూతురి బండారం.. నాతో కలిపి 9 మందిని పెళ్లి చేసుకుందంటూ పీఎస్ మెట్లెక్కిన భర్త

మహబూబాబాద్‌లో ఓ నిత్య పెళ్లి కూతురు బండారం బయటపడింది. ఆమె రెండు కాదు, మూడు కాదు.. ఏకంగా తొమ్మిది పెళ్లిళ్లు చేసుకుంది. ఆ నిత్య పెళ్లికూతురు చిట్టాను తొమ్మిదో భర్త బయటపెట్టాడు. తనకు విడాకులు కావాలని డిమాండ్ చేస్తున్నాడు. అయితే ఆ మహిళ భర్తకు విడాకులు ఇవ్వకుండా.. అతడిపైనే పోలీసులకు ఫిర్యాదు చేసింది. భర్త వేధిస్తున్నాడంటూ.. తనకు న్యాయం చేయాలంటూ పోలీస్ స్టేషన్ ఎదుట బైఠాయించింది.

వివరాల్లోకి వెళ్తే.. మహబూబాబాద్ జిల్లా మహిళకు.. ఏపీలోని కృష్ణా జిల్లా గంపలగూడెంకు చెందిన వ్యక్తితో మ్యాట్రిమోని వెబ్‌సైట్లో పరిచయమైంది. ఆ పరిచయం పెళ్లికి దారి తీసింది. అనంతరం వీరి వివాహం జరిగింది. బెంగళూరులో ఈ జంట కాపురం పెట్టింది. పెళ్లి జరిగిన తర్వాత కొన్ని నెలల పాటు మాత్రమే వీరు కలిసి ఉన్నారు. అయితే సదరు మహిళ తరచూ ఫోన్లో కోర్టు విషయాల గురించి మాట్లాడుతూ ఉండేదని భర్త చెప్పాడు. ఏంటని అతను ప్రశ్నిస్తే గొడవకు దిగేదన్నాడు. ఇదిలా ఉండగానే ఆమె అకస్మాత్తుగా హైదరాబాద్ వెళ్లిందని.. తిరిగి వెళ్లి వచ్చాకా మరోసారి హైదరాబాద్ వెళ్తానని అనడంతో అనుమానంతో ఆరా తీసినట్టుగా మహిళ భర్త చెబుతున్నాడు. ఈ క్రమంలోనే తన కంటే ముందు 8 మందిని పెళ్లి చేసుకున్నట్టుగా గుర్తించినట్లు చెప్పాడు.

ఇక ఆమెతో కలిసి జీవించలేనని భావించి విడాకులు అడిగానని అతడు తెలిపాడు. అయితే అందుకు ఆమె ఒప్పుకోకపోగా భర్త నుంచి ఇబ్బందులు ఎదుర్కొంటున్నట్టుగా పోలీసులకు ఫిర్యాదు చేసింది. తన భర్తే నిత్య పెళ్లికొడుకు అంటూ ఆరోపించింది. తనకు న్యాయం చేయాలని మహబూబాబాద్ పోలీస్ స్టేషన్ ముందు బైఠాయించింది. ఈ విషయం తెలుసుకున్న మహిళ భర్త.. అతడు సేకరించిన ఆధారాలను పోలీసుల ముందుంచాడు. దాదాపు 5 నుంచి 6 పెళ్లిళ్ల వరకు ఫొటోలు, వివరాలు సేకరించినట్లు అవి చూసైనా.. తనకు విడాకులిప్పించాలంటూ కోరాడు. ఈ క్రమంలోనే పోలీసులు ఇద్దరి ఫిర్యాదులపై విచారణ జరుపుతున్నారు.